Naga nunger den apet Kisan Samman Nidhi inyaktsü

Dimapur, July 5 (TYO): Naga nunger ali kibur inyakyim den putepa Prime Minister Kisan Samman Nidhi (Farmer’s Welfare Scheme) inyakdi ta Nagaland sorkari asüngdangba Union Ministry of Agriculture, Govt. of India-i molunga agizükogo.
July 2, 2019 nü Agriculture & Cooperation Minister G. Kaito Aye-i Union Minister of Agriculture Narendra Singh Tomar dang iba tebilemba lemsatep.
Iba senden nung Centre sorkar nungi Secretary Agriculture, Secretary DONER, Secretary Land Resources nunger aden aser Nagaland nungi Minister Kaito den Additional Secretary of Agriculture, Govt of Nagaland, Temsunaro Aier aser Nagaland State Nodal Officer for the PM-KISAN scheme Letkholal Hangshing na liasü.
Nagaland nung ali kibur indang inyakyim nung kiburtemji teimbaji kin/kidong/khel mesüra yimsüsürtem lir. Iba jagi Nagaland Agriculture Minister-i Nagaland nung PM-KISAN scheme asoshi village council mesüra village chief, Block/Division/District nung ketdangsertemi aser district shia nung Deputy Commissioner temi kuli agütsütsü atema tebilemba lesmatep.
Iba tebilemba ya benoka olemtepba sülen senden nung adener ajaki molunga agizük, ta Press Secretary to Minister Agri & Coop-i sangdong ka nung metetdaktsü.
India sorkari tenzükba PM-KISAN scheme ya aluyimertem yaritsü atema lir. Iba ya Central Sector scheme ka lir aser Centre-i senotsü 100% agütsür.
Iba scheme kübok ali hectare 2 tashi aliba aluyimer nem küm nung shilem asem lemsar sen meyirjang 6 agütsütsü.
State Government aser UT Administration-i iba scheme kübok teyari angutsüba aluyimertem jangjatsü aser aser senji aluyimer indang bank account-i dang yoktsü.