Naga nunger election ?

India den Naga yimten jenjang ka latettsüba ken o jembiba nung ya Naga nunger lushi, temzüng ozüng aser nisan dak aketba onüktem dena lir. Ibayongji, India government o Naga nunger linük tenzükertem na tsüngda telemtetba kati arutsü mapang agir südi. Atangji, tejembirtemi enoksema jembia alitsüa akok saka mejembisemika alinunga, Naga yimten tebilemtsü latetba mapang süoki ia bilema latettsüba onük kaji Naga nunger yimsüsürtem shimba election yimya ya ka asütsü. India telongjem kübok tang tashi nung asenok state balaka kümer election agia aruba mapatem ya bilemdangra, asenok dak mapet aser majungba inyakyim kaji tang agiyonga aruba election ya lir. Tangarbo election ya alima yanglutsü atema agir saka asenokbo election agidang kija, kibong aser lokti raksatsür. Election magi asübo, Naga nungertem ya kanga putepa lila aser terenlok mapatema meinperong kecha melii kanga junga inyaka oa lila ta bilemer. Asenoki asen lima nung terenlok mapatem inyakba ya meyipa reprangdangra, tang gari lenmang lapoka aliba, school aser mozü kitem tejen kümer meyanglushitet aliba aser industry kar lapoktetba ajungaji Nagaland nung Naga nungertemi election agiba yimya ya junga memetet, Naga nungerji Naga nunger ama tongmelang aser teindang aliba mapang inyaktetbatem lir ta angatettsü. Idangjibo, election agiaka nübortemi vote yoka achitsü, proxy vote enoktsü aser tashiyim amshia adoktsüba indang tebilema mebilem. Ano, tajung kaji, Nagaland kümlibo Nagaland nung politucal party aikabo maliasü. Naga nungertemi yimten telok ana indang dang jembi aser ana rongnungji ka National party, aji India nunger party ta jembi aser kaji Regional Party aser aji Naga nunger party ta jembi. Tetezü, tamasabo Nagaland nung pasasa agi yimten telok ana dang liasü. Party anaji ka Nagaland Nationalist Organisation (NNO) aser kaji Democratic Party of Nagaland (DPN) liasü. NNO telokji Naga Peoples Convention, shirnoki Nagaland state akümtsü atema India den onük 16 renem, parnoki akümba telok liasü, anungji nübortemi parnokji India tsütsü tejak shitsürtem ama agi aser tanga telok DPN telokjiang Naga nunger asoshi ano bendanga agüja inyaktsü purtem ta bilem. Atangji, NNO aser DPN na prongla shitakba nungbo Naga Regional telok liasü. Iba amaji Nagaland tenzükba mapang temeja yimten telok ana ser election nung toktep aser government küma yimsüsüa arudang manger sangwa nung Nagaland tesüngmangtsüka renlokyonga ao. Iba mapangbo küm atemdang, India government-i lemzüktsüba sena magimai meyipasa agütsü ta jembiba angashiogo. Tetezü yimsüsürtem dang masü saka nübortema ochishir aser teindang nisungtem dang liasü. Yimten telok ana dang asünungji, nübortem asoshi teratatsü aikabo mali, pei angatetba yari yimten telok ka nung mesüra ka nung adentsü. Iba amaji election temer külena government akümtsü atema nübo mabensaba agi tangar telok nungi tatartem mesüzüktsü nüngdaka madok. Iba amaji yimten telok anadang aliba agi, government-a manokshii kümsük küm tatem tashi bener otet aser opposition nung alirtema tanga telok nung aploktsü kecha mebilemi nübortem ajangzükdaktsütsü asoshi dang bilema inyak. Iba amaji, tanüa Naga nunger asoshibo yimten telok ana dang asüba tajungba asütsü ta bilemer. Tang ama yimten telok aika asüba agi, election nung toktepertema aika adoker aser nübortemia telemtetba junga magitetter. Aji oda, election nung yimten telok aika nungi nisung aika toktepba agi nüngdak makaba rongsen aser nübo aika lalur aser ashiko tesem aika nung nisung aika rongnungi tamajungtiba-ang ka shimtettsüa akok. Kodang yimten telok aika südir, yimten nung shilem aginürtem aika yimten telok nükjidong angatetba agi masü saka pa mesüra la ajangzüktsü atema yimten sabang  bushia yimten telok melenpet melena senzüba asenoki angur. Iba jagi yimten lenirtema aika takoksa ajurur aser Nagaland-a akoksar. Item timtem aser takoksa nokdangtsü atema, India telongjem küboksa liaka, Nagaland nungbo yimten telok ana dang alitsüba yimten inyakyim ka latettsü junger ta bilemer.