Naga nunger indang kaket ka sayaogo

Dimapur, September 24 (TYO) : Naga limai British, America aser India nungertem tetsüng ajemoka aliba tensa tia indang English agi tebu tedi Wb. Kibangwari züluba kaket ka tenüng agi ” The Nagas With The Three Great Nations,” tanü Honibar nü Dimapur Ao Baptist Arogo nung sannüker, Rev.Dr.N.Tzüdiri sarasaadema sayatsüogo.
“Lipok nungi tanü tashi nung Naga limai tangar kin arua Naga nunger den aliba kintemji asem dang lir , item kin asempronglaji alimai kin tulu ta züngshiba kintem, itemji British, America aser India nungertem lir, ibayongji iba kaket ya “Kin tulu asem den Naga nungertem,” ta jatsüogo,” ta kaket züluri metetdaktsü.
Naga lima nung mezüng bendanger arua alibajibo Ahom nunger aser iba sülenji British nunger, America nunger aser tesüsa India nunger liasü ta iba kaket nung shia lir.
Alima tanabuba tongpang nung Naga nungertemi British nungertemi aniba Allied Force telok asembaji America nungertem mechi asemba liasü, kechiyong America nungertemi Naga nungertem shisa tenük lapokja yari aser meima anepalu. Iba amaji ka masü nungbo Japan nungertemi Naga lima medoktsüla ta kaket zülurisa shisema lir.
Iba kaket ya pezüsü küma lemsar zülua lir aser mezüng shilem (chapter 1) nung Naga nunger otsü den Aor sobaliba indanga shisema lir aser tanabuba shilem nung Naga nunger o British nunger na lia aruba ama indang, tasembuba shilem nung  Naga nungertem o America nunger missionary-tem indang aser tesübuba shilem nung Naga nunger o India nunger na lia aruba indang shia lir.
Iba kaket ya kaket zülusangi tsüraburtem nungi angazükba, pa nük agi anguba, osang kakettem nung züngshiba aser tangar kaket zülurtemi Naga nunger indang züluba kaket 28 tashi nungi bendena zülua lir.
Iba kaket ya tapak 291 lir aser kaket jenjang sen Rs. 350/- agi kaket ayokdak aser kaket yoka senzürtem ket nungi angutsü.