Naga nunger kaketshir ajaki Information Technology metettsüla: Dr. Shürhozelie

Civil Secretariat nung Chief Minister Dr. Shürhozelie Liezietsu-i pa indang office chamber nung Director Higher Technical Education ket nung computer set agütsüdang agiba noksa ka angur. (Kohima, June 20)

Kohima, June 20 (TYO): Naga nunger kaketshir shia nem Information Technology indang tesayuba agütsütsüla, ta tanü Nagaland Chief Minister, Dr. Shürhozelie Liezietsu-i ashi.
Mongulbarnü Civil Secretariat nung pa indang office nung sorkar college tem nem computer sets agütsüba sentong nung jembidang, Dr. Shürhozelie-i ashiba agi, “Linük indang IT sector nung Nagaland ya jenjang 5 nung lir aser iba jenjang atongba atema IT department dang kanga pelar.”
“Alima ya digital lima ka akümer, anungji Naga nunger kaketshirtemia tangar sülen anidaktsüla. Naga nunger kaketshirtemi technology ainba den tsüngsü medema anidaktettsü aser tarutsü anogotem nung Naga nunger kaketshirtemi Information & Technology nung tajungtiba akümtsü imlar,” ta paisa shisem.
Sorkar college tem nem computer sets agütsüba ajanga sorkar rejutem nung azüngba kaketshirtem computer education nung tashi aittsü, ta Dr. Shürhozelie-isa metetdaltsü.
Sorkar indang college tem nem agütsüba computer sets ji Ministry of Tribal Affairs-i senotsü teyari agütsüba ajanga lir.
Computer sets 100 nungi 50 ji accredited government college 5 nem agütsütsü aser 50 ji government college 10 nem agütsütsü.
Tanü agiba sentong nungsa Chief Minister-i Kohima Science College, Fazl Ali College, Mokokchung aser Dimapur Government College nem state sorkari bus asem agütsütsü ta osang metetdaktsü.