Naga nunger kaketshir lennirtem saksalemtsüla

Assam nung ozüng alema arurtem indang tebilemtsü ya tang tasen masü saka küm aika tejakdang nungi iba tebilemtsü atema ola adokyonga arur. India nüjiso mangudang Assam nung Prime Minister aser nüjiso ngur Chief Minister inyaksang Gopinath Bordoloi-i Linük nüjiso mangudang yongi iba tebilemtsü atema ola adok. Assam state nütsüng yongsük national average dang nungi kanga talila inlokba atema Bordoloi-i tebilemtsü bena jembi aser iba atema Muslim League lennir Mohammed Saadulla tena mapang shia o atsütep. Linük nüjiso anguba sülen Assam nung nütsüng yongsük kanga kara inloka ao aser ibaji taoba mapang East Pakistan (tang Bangladesh) nungi nisungtem ozüng alema aruba ajanga liasü saka iba tebilemtsü ya linük sabang nung süoki iba mebilemi dang liasü. Ajisüaka, 1979 küm sülen ang iba onük ya linüki meteta aküm. All Assam Students’ Union (AASU)-i ozüng alema arurtem anema India nung non-political mass movement tulutiba inyaktsü tenzükba sülen ang linük ajungai iba tebilemtsü meteta aküm. Assam nung ozüng alema arurtem anema lungkak aitba sülen 1983 küm Parliament-i Illegal Migrants (Determination by Tribunal) Act yanglu saka iba Act ajanga khuret mokoktet. Iba mapang AASU tanishirtemi tarutsü dak nükla yur iba mapa inyak. Ozüng alema arurtemi tarutsü nung timtem aser khuret bentsür arutsü ta parnoki angatet aser iba jagi parnoki ozüng alema arurtem anema noktaktsü tenzük. Parnoki yashi iba mapa tenzüka yutsüba ajanga tanü National Register of Citizens (NRC) indang final draft sayaogo. Hao, iba mapa yangi tembanger masü saka final list ka renemtsü aser iba sülen jiang shitakba India senso aser bendangertem bendangtsü, saka Assam nung tang tashi NRC mapa inyaka aruba ya takok tulu anguba ka lir. Assam nung kaketshir lennirtemi ozüng alema arurtem magizükba nung tongtipang onük ana liasü aser ibaji- litsü aser maitsü. Tarutsü anogotem ozüng alema arurtemi lisopur indang ali aser maitsü nung lendong bentsür arutsütsü ta parnoki angateta iba mapa inyaktsü tenzük. Assam nung NRC indang final draft sayaba sülen Assam den kidangsüa aliba state tem- Manipur, Meghalaya aser Arunachal Pradesh nungbo kaketshir teloktem tongti sür pei pei state nung ozüng alema arurtem kanga akangakanga mita anükba osang asenoki angashir. Atangji, ozüng alema arurtem aser talisa Bangladesh nungi arurtem dak lendong keta aliba agidang item state nung kaketshir teloktemi akangakanga mapa inyaker. Ajisüaka, asen Nagaland state nung reprangdangra kaketshir teloktem aser talisa Naga Students Federation (NSF)-i anir ozüng alema arurtem indang tebilemtsü atema mapa balaka inyakba mangur aser osang kecha mangashir. Oda, osangkakettem aser social media nung state sorkar dang akhangba/mepishiba dak alaka kaketshirtemi mapa kecha meinyaker mangur. Hao, district administration aser police temi Dimapur-i aruba lenmangtem nung ILP mita reprangdar saka iba yagi dangbo meperir. Tanga state tem nung amaji, Naga nunger kaketshirtem lennirtemia tarutsü atema khuret bena aser talisa bendanger ket nungi asen litsü aser maitsü kümzüka ayutsü atema mapa inyaktsü nüngdaker.