Naga nunger kentener teloktemi Nagaland adena orr shilem agitsü

April 11, 2016 nü Dream Cafe, Kohima nung osangbener senden nung (abelen nungi) Divine Connection züngsem Bendang, MTF Coordinator Theja Meru, Parliamentary Secretary Khriehu Liezietsu aser Alobo Naga nungertem angur.

Kohima, April 11 (TYO) : Naga nunger kentenertem ajungkettsü nükjidong nung Nagaland sorkari kentener telok 8 tashi India kübok yimti balala nung shilem agidaktsütsü.
Iba sentong ya The Hard Rock Cafe Tour 2016 alitsü aser iba osang ya Hombarnü Dream Café nung osangbener senden ka nung Youth Resources & Sports, State Lotteries & Music Task Force, Parliamentary Secretary, Khriehu Liezietsu-i metetdaktsü.
Iba sentong ya Music Task Force-i Dream Corp Nagaland den yaritepa acha-ayanger aser coordinator ji Theja Meru asütsü. The Hard Rock Cafe aser Rollingstone India nati yaria Naga nunger kentener teloktemi linük tesem balala nung kenten sentongtem ayongzüka agitsü, ta Khriehu Liezietsu-i metetdaktsü.
Taküm May nungi December ita tashi, itashia Nagaland nung telok anati Hard Rock Café anana nung shilem agidaktsütsü, ta paisa shisem.
“Iba dak sendakba asoshi onoki The Hard Rock Cafe aser Rollingstone India den Memorandum of Understanding agiogo” ta Khriehu-isa ashi.
May 12 nü Alobo Naga and The Band-i Hard Rock Cafe, New Delhi nung iba Tour tenzüktsü aser iba sülen June 2016 nung Divine Connection-i shilem agitsü.
Nagaland sorkari kentenertem taru-tao atema sen agütsütsü aser Rollingstone-i parnok anenzüktsü anepalutsü aser The Hard Rock Café-i parnok shilem agi taa agütsütsü, ta MTF Coordinator, Theja Meru-i tanü osangbener senden nungsa metetdaktsü.
Alobo Naga aser Bendang nati parnok telok tenüng o jembidang ashiba agi, The Hard Rock Cafe aser Rollingstone India ji alima nung brand tajungtem rongnung densema lir aser iba maongka anguba atema kanga pelar.