Naga nunger kentenertemi teimla agütsür

Kohima, Rongchii/April 05 (TYO): Coronavirus ajanga linük ajunga shibanger aliba mapang kentener nübu tejangja, Nise Meruno-i anir Naga nunger kentener balala ajanga mezüngbuba ‘Nagaland Virtual Choir’ tenzüka alima nung aliba nüburtem nem teimla agütsür. Choir temi ‘An Irish blessing’ ken atenba ya record asütsü atema anogo asem agi aser edit asütsü anogo ana agir March 29, 2020 nung publish süa tang tashinung YouTube nung views 21,000 dak tema kümogo.
Osangbener den jembiba mapang Yamaha artist aser Nagaland Virtual Choir Project director Nise Meruno-i ashiba agi, iba ama tammang tia nung coronavirus tashidak wara anema raraba mapang linük tesem balala nungi Naga nunger kentener nisung 18-i iba sentong nung shilem agia nüburtem nem teimla agütsür aser temulung anisüngzüktsür. “Ken nung taneptsü lir aser ken nung teimla lir. Anungji nüburtemi asenok ola angashia tepela prokshiba dak alia tajungba kechi ali,” ta Meruno-i ashi.
Virtual choir atema Meruno mulung nung teti tajungshiba ka liasü aser pai ashiba agi, linük tesem ajunga shibangba ajanga mapa inyaker kentener ajak kidang alitsüsa aküm aser ibayongji iba project asangsang aküm.
Linük tesem ajunga shibangba ajanga kentenertem mulungjang aser senotsü nung kanga mejungi akoksatsür, anungji iba project ajanga kentener nem pei mapang aser sempet tajungba nung amshitsü teimla sayur, ta pai ashi.
Pai ashiba agim video ya mobile phone tem nung record asü, kechiaser ken mangaokba nung amshiba osettem tang mamshiteter. “Iba ajanga project ya kanga ochi aser nüburtem tsüngda sendakteptsü asoshi tapet ka ama ni bilemer. Aser iba ajanga tang tensa tagitarutsü ka kümdaktsür,’ ta Meruno-i ashi.
Osettsüset teperi mali iba virtual choir project ya inyakba den kentener shiai iba ken bilema aser kechi koma adoktsüar memetet pei shilem ken atentsü ya tasaktiba liasü, ta pai ashi.
Takotet artist tem aliba telok kati iba project ya ketdang asü aser iba video sayaba sülen alima tesem balala nungi kentener mongintem nungi telangzüba tajung agüja maneni ajungmesor, ta paisa lemsatep.