Naga nunger kibong ka küma longjemtsüla : Dr Imtiwapang Aier

Longpa, January 15 (TYO) : Naga nunger tsüngda telongjem maliba ajanga Naga nunger loktiliba nung telemsa balala adoka lir, anungji Naga nunger kibong ka küma longjemtsü merangtsüla, ta Geology & Mining Parliamentary Secretary, Dr Imtiwapang Aier-i ayongzük.

Longpa yimdak Asetkong Mungdang 68 buba Lokti Senden nung tongti tesemdanger o jembidang Dr Imtiwapang-i iba onük jembi.

Telemsa aliba ajanga yimya-tsüya tamajung aser ochimashi inyakyim lir aser ajak dang tongtipangbaji ketdangsübaren nung tashi mait. Item ajanga asen tetsü-tebou mapang Naga nunger tenüng tajungtem menentsür, ta paisa ashi.

Asenoki tesüiba aser tang ongdang adoka aliba sendakteptsü atema meranger masü saka mangatettep ang tuluba adokdaktsür. Iba ya lanu putu atema majung aser iba asoshi kanga khuret süa bilemer, ta Dr Imtiwapang-isa ashi.

Iba dak sendakba nung pai tsükongsangertem dang aibelenbatem metongshitsü aser tarutsü tia tajungba yanglutsü tayongzükba agüja liasü.

“Naga loktiliba nung telemsa adokbaji loktiliba nung ketdangsübaren tamakok ajanga asütsü akok, kechiyong asen loktiliba nung tangatetba balala nung telok aser NGO aika tenteter” ta paisa ashi.

Dr. Imtiwapang-isa ashiba agi, India nüjiso mangudang India nung yimli 500 shi lemsa liasü saka telemsa ajanga takoksa bener arutsü ta ajiteta, item yimlitem ajak longjemer India linük aküm.

“Asenoki tang temelenshi bener marura, tarutsü nung asen chirnurtemi temelenshi bener arutsü asoshi teimla teyu. Asenoki asen loktiliba yanglushi mesüra raksatsü ta tarutsü nung asen chirnurtemi asenoki inyakba meyipa reprangtsü aser iba mapangji parnok aseni aibelentem atema tatok magütsütsü” ta Dr Imtiwapang-isa ashi.

Senden nung tongti o jembir Clark Theological College, Aolichen Dean, Rev. Dr. Mar Pongener-i “Shilangdi” onük jembi.

‘Shilangdi’ ta asübaji tarutsü atema tesüiba aser tang na medemdangtsüla, ta pai ashi.

2016-2019 atema Asetkong Mungdang mendenpurtem

President: A Nungsang Jamir (Longjang)

Vice President:  L Supo Jamir (Longpa)

General Secretary: K Zulu Lemtur (Sungratsü)

Asst. General Secretary: Partoshi Aier (Chami)