Naga nunger külemi litettsüla

Naga nunger kin o kin na aser yim o yim na tsüngda meputep adoka tsükchitep manenba tebilemtsü yagi Nagaland nung town aika rajang kümdagi. Asenoki ibaji reprangtetter asü mereprangtetar ashitsü makok saka Nagaland innüseta mainba tashidakji kin o kin na aser yim o yim na tsükchitepba timtem ya ka asütsü. Kong südir süaka yimti tuluka küma renloktsübaji nütsüng aika arua ali nung dang renloktsü aser nütsüng aika arua litettsü asoshi koba yimti nung südir süaka talirtemangji kibur kümküma alitsüla. Iba ama kibur kümteta, ya ozü lima aser ya ozü yimti ta kecha tarendaktsü makai talir ajaki bilema ali nung dang yimtiji ajak meyong küma ulutsü. Iba jagi tangar lima nung asenoki repranga lia yimti tululu küma aor. Atangji, asen lima nunga Dimapur yimti ya ibaji mesüka lir. Nagaland nunga Dimapur yimti nungbo talir ajak kibur kümtet-kümteta alir. Iba yimti nung yabo Naga nunger dang masü saka tsümar dena pei tasoli küma alir. Iba jagi Dimapur ulur. Iba amaji Nagaland nung yimti ajak ulutsüla. Ajisüaka, tebilemtsü kaji asenoki asen yimti nung alirtem ajak asen kübok yuner, anungji kasa town nung alir süaka karbo senso aser karbo bendanger ta bilema alir. Aji oda, tesem kar nung lendong atalokra, kasa town nung alirsa süaka telok tulubai telok tilaba nem timtem agütsür, anungji telok tilaba purtembo teti tsübuseta dang alir. Ibayongji, kodang mapang tajung ka arudir, idangji telok tilaba purtemi yimtiji toktsür aor. Tanü Nagaland nung District Headquaters yimti terka tashi kümogo aser item kübok sub-division jenjang nung town aika kümteta lir. Ajisüaka, Dimapur dak alaka tanga yimtitem nungji Naga nungertem ajaki pei lima aser pei yimti amabo bilema melitetter. District headquaters aser sub-division ajak nung ali kibur, lisopur, sensopur ta asüba agi tangar aruagi senso küma melitetter, kechiyong ali kibur mesüra lisopurtem mesüra kechi mapang nung kechi ataloktsüar memetet, anungji kidanga teti agitsüba oset tajungbo alia mayur. Ibayongji, asenok yimtitem nung nütsüng merenloker aser kiojen tasen meyanglur. Asenok ajaki metettsüba kaji asen yimer mesüra asen kin kijai yimti tuluka mekümtettsü. Aji oda, asen yimer mesüra asen kisüng atema dokan tulu lapoktsü nüngdak madoktsü. Nütsüng mali nungji mozü ki aser kaketreju tulu lapoktsüa nüngdak madoktsü. Aji oda, town süaka kodang nütsüng ajema kümdir police station ayua malang akümtsü. Item ajakji asenok mulung nung yur, kong aser koba town nung südirsüaka talir temangi ali kibur ama bilema tetsübu tarendak melii litettsüsa asenoki tensa mapangji yanglutsüla. Tanü ama tesem kar nung lendong atalokdang, town kar nung telok tulubai telok tilaba purtem ki rongdokja amokmerenra, ibaji peisasa pei ki raksar amai asütsü. Telok tulubai tilaba akokba aser tashi taitbai tashi maitba akokba takok nung kecha konang mali. Ajisüaka, lendong timtem mapang telok tulubai tilaba purtem kümzüka anepalura, iba nungjiang konang nüngsang aser temoatsü lir. Naga nungerbo kong südir süaka kinunger tajung ama bilema yariteptsüba dak alaka kati ka taküm samatsütsü tashibo tebilema mebilemtsüla. Alima nung alir asünungji, tetibo tesünep aser tangatettep nung malitsüa akok, ajisüaka kodangsa ali aser tzü dak sendakba ken o asütsüa akok mesüra kin kidong tenüng aser otsü daka aketba ken o asütsüa akok, itemji timi külemi mener angatetteptsü merangtsüla. Aji oda, Naga nunger anüdok aser anülu kecha mali, kong lidir liaka pei lima, pei yimtsüng aser pei yimti nung alir ama sadoksadoka alitsüsa asenok ajak dak tangatetba alitsüla. Kodang nisung ka tesem ka nung tetsübu tarendak makai pei ki yanglur lidir, iba limaji tulu küma renloktsü, kechiyong yangji ali kibur ta jangjaba aser bendanger ta bilemba nisung shinga kolok nung mali. Ajak kibur, anungji ajak meyong anungji ajaki anepalutsü. Kong kechi lendong atalokdir atalokaka, iba yimti nung alirtem dakbo mekongshitsü, kechiyong yangji kin tulu tila aser sensosanger aser bendanger ta bilema alirtem mali, ajak kasasa sensosanger. Iba ama yimtiji asen district headquaters aser sub division nung aliba yimtitemji asütsüla.