Naga nunger lanur asür asem bilemteta Kohima aser Dimapur nung Candlelight memorial service kaogo

Dimapur nung Jan. 31 nü khasetba Naga nunger lanur ana, Bendangnungsang Lkr aser Khriesavizo Metha na aremdak leper, Kohima nung (abelen) aser ano Dimapur nunga Super market nung tenati Naga nunger asoshi taküm tenla agütsüba bilemteta temo milen tsükloker sentong agiba noksa nung angur. Feb. 09. 

Kohima/Dimapur, February 09 (TYO): Nagaland nung Urban Local Bodies (ULBs) dak sentakba nung mepetmesü adoka police-i injang yoka kahsetba asürtem bilemteta Brihostibar aonung Kohima nung tribe tentet balalai Candle light service kaogo.
Angami Public Organisation (APO) lenisüba nung memorial service ji Naga lanur ana aremdak tesem nung asür Khriesavizo Metha, asür Bendangnungsang Longkumer aser asür Tsapise Sangtam nunger tenüng candle agi zülur tsükloka akhüm agütsü.
Asür Khriesavizo aser asür Bendangnungsang na January 31 aonung Dimapur nung police-i kahset aser asür Tsapise Sangtam ya Longkhim nung yirua liasü saka mekümzükteti February 5 nü asü.
Par asem mangyima Nagaland Tribes Action Committee (NTAC) Kohima, Convenor, K T Vilie-i, “Chief Minister T R Zeliang menden nungi aluba ajanga nübur nem ochi temeten mangu tashi asürtem tanela animesüngzüktsüa akok,” ta ahi.
Paisa, NTAC Kohima-i matsüngshii nokdaktsü aser takhangbatem mataloktsü tashi maparen manentsü, ta metetdaktsü.
Angami Youth Organisation (AYO) Tir, Neinguvoto Krose-ia, tang shima aliba MLA temji Temzüngi shimba masü, saka nüburtemi assembly züngsem shimba lir, anungji sorkari nüburtem ola angatsüla, ta ashi.
State tepiyong nung candel light service agiba sentong nungsa mangyimer kibongtem nem tashi agüjang ta sarasademtsüba den külemi yirua alirtem tekaraba nung taneptsü angutsü atema sarasademtsüogo.
Dimapur: Taonung Dimapur nunga Naga Youth-i ayongzüka Naga Shopping Arcade, Dimapur nung nisung noklang aika adenshia Naga nunger lanur asür ana nem akhüm agüja candle light service kaogo.
Iba service nung Joint Coordination Committee (JCC) Convenor, Supu Jamir-i, “Lanur ana- asür Khriesavizo aser Bendangnungsang nati taküm bendanga agütsübaji takoksa ka masü, saka ibaji ajanga pei lima meimtsü aser Naga nunger tsüngda telongjem alitsü atema lenmang lapoktsüogo,” ta metetdaktsü.
Paisa, “Prangpong jagi teti dangbo lenmang mengutettsü. Ibaji tensa apir amshitsüla, saka pei lima meimertem tepsettsü atema mamshitsüla,” ta ashi.
Supu Jamir-isa, Chief Minister T.R.Zeliang-i February 10 nü tashi nung pa menden nungi malura NTAC aser JCC-i state tesem ajaklen longkak tesashiba aittsü, ta metetdaktsü.
Asür Bendangnungsang’er kinungertem tenüng nung Aomeren-i, “Asen tongbang ya tatembang ka masü, asenoki asen jenjang toktsür asür Khriesavizo aser Bendangnungsang na ajanga ajungmesodakja asenoki ochi temeten atema iba tongbang raradi,” ta ayongzük.
Asür Khriesavizo tebu, Neimhalie Mehta-ia, January 31 anepdang par jabaso tena ‘Kechiba asenok Naga nunger melongjemer’ onük nung o lemtepba lemsatepa liasü.