Naga nunger li ajak yimten ka küboki aittsüla : NTC

Kohima, August 22 (TYO) : India government o NSCN IM telok na küm 18 tashi Naga yimten tebilemtsü latettsü asoshi ken o jembia arur külen yaküm 2015 küm August 3 nü ‘Framework Agreement’ yanglubaji Nagaland nung alirtemibo mangu aser memetet, kechiyong ibaji kodanga mesayu ta tanü India ato kilonser dangi züluba shidi ka nung Nagaland Tribes Council-i metetdaktsüogo.
Anungji, iba ‘framework’ kübok telatetba kati arua renemdang tang Nagaland nung aliba Naga nungertem taküm aser rongsen tangar bendangertem nem mamokbangdaktsütsü atema 16 Point Agreement nung renemba ama linük temzüng arla 371 (A) nung enoka lateta aliba onüktem den memeyokteptsüla aser meyanglushitsüla ta NTC-isa metetdaktsü.
Nagaland nung aliba Naga nungertem ya ishika dang aser parnok ya India nung tamalen lenirtemi temzüng ozüng kar ajanga wazüka meyura samatsü amai reprangtet aser parnok li aser yangji aliba rongsentemji meliang parnok taküm alitsü tamakoktsü ta reprangtetba agi, parnoki Naga nungertem ya temzüng ozüng balaka kübok Nagaland akümdangyongi wazüka yutsü ta NTC-isa metetdaktsü.
Aji oda, Nagaland akümtsü atema renemba 16 Point Memorandum nung Point 13 buba nung Naga nunger li ajak Naga nunger yimten ka küboki aittsü atema shia lir aser ibaji atema NTC-i nokdaker ta parnokisa ashi.
Anungji, kodangsa Naga nunger longjemdir, ali o nisung na külemi longjemtsüla, iba jagi dang Naga nungertem longjemdang ali dena yimten ka küboki aittsü ta NTC-isa metetdaktsü.
Tang aliba Nagaland state tasazük ya 16,579 Sq. Kms dang lir aser yangji nütsüng million 2 lir, anungji yangji aliba lisopurtem asoshi aliji tilaka dang asünungji, timtem nung alirtem ajak anidena amongba tesem ka mesüdaktsütsü, anungji ali dena mesüra nisung kija longjemba telongjem aser terenemba ken o bo onoki magizüktettsü ta parnokisa metetdaktsü.
Iba tangatetba nung kodang ‘Framework Agreement’ nung ajemdaker telatetba ka dangi arudir, Nagaland nung alirtem aser ano Naga nunger linük tenzükertem telok ajaki meteta aser shilem agidakja latettsüla ta NTC-isa ato kilonser dangi züluba shidi nung metetdaktsü.
Iba shidiji Kohima nung Nagaland angh ajanga ato kilonser dangi yokogo.