Naga nunger li tsümar keti maotsüla : Naga Hoho

Kohima, June 09 (TYO) : Tanü asüng ka nungi tenzüka Nagaland nung senso masüba tsümartemi Naga nunger li bank mesüra tanga lenmangtem bushiteta alir, ajisüaka ibaji linük temzüng anema lir, anungji magizüker ta Naga Hohoi metetdaktsüogo.

Naga nungertemi bank nung sen apur saka maotetter, anungji iba melen bank-i ali agiadoker aser item liji senso masüba tsümartem dang yokadoker, saka ibaji linük temzüng arla 371 (A) aser Nagaland Government Land & Revenue Regulation (Amendment) Act 1978, Section 2 (2) anema lir kechiyong item ozüngtem ajanga Nagalang nung senso masüba nisungi ali kimong alitsü aser agitsü memelar ta Naga Hohoisa jangjatsüogo.

Anungji, bank aser sen aputsürtemi item ozüngtemji meteta inyaktsüla, kechiyong iba jagi tarutsü nung Naga nunger kanga akoksatsütsü ta Naga  Hohoisa metetdaltsü. Iba o yagi bank nung sen apur sentsü maor pu asemer ta mangatetdaktsüner ta parnokisa ashi.

Naga Hoho-isa state nung yimsüsürtem dang linük temzüng ozüng nung temeten agüja aliba meteta shtak benshitsü asoshi ketdangsertem ajak nem tangatetba agütsütsüla aser Naga nungertemia tangar dang ali kimong mayoktsüla ta metetdaktsü.