Naga nunger linük tenzüker telok asem yariteptsü nangzüker

Dimapur, Sept.09 (TYO) : India sorkar o NSCN-IM na August 3 nü Naga yimten tebilemtsü ken o tatembang küma latettsü asoshi renemba ken o ajanga tangsabo telemtetba kati arua mangu nungji, kodang südir süaka Naga nunger ajak ajungtsüsa telemtetba kati arutsü asoshi kati ka den yariteptsü ta Naga yimten nüjiso bushir telok asem tenangzüktepa agiogo.
Naga yimten tebilemtsü ya latettsü atema India sorkari item teloktem jaokra, iba mapang pei telok tangatetba balala liaka, tebilemba ka kümer nübortem ajangzüktsü asoshi kati ka den shisalemsatepa yariteptsü ta parnok rongnung tenangzüktpeba ka agiogo.
Item teloktemji Khole aser N. Kitovi Zhimomi nati aniba GPRN / NSCN; S.Singnya aser Zhopra Vero nati aniba NNC/FGN aser Z. Royim Yimchunger aser V.Nagi nati aniba NNC, Kiumukam aser Hangping Zeliangi aniba NNC ( Non accordist) nungertem liasü.
Parnokisa India sorkar dang Naga yimten tebilemtsü latetba maparen nung parnoki memeteti latetba nung parnok madentsü aser Naga nungertemi magizüktsü ta metetdaktsü.