Naga nunger loktiliba nung temelenshi bener arutsüla : Y. Kikheto Sema

Dimapur, September 24 (TYO) : Honibarnü Kohima Sumi Students’ Union (KSSU) pur 62 buba Annual Session-cum-Freshers’ Meet amung.
Iba sentong ya The Heritage, Old DC Bungalow nung ayongzüka amung aser tongti tesemdangerji Land Resources Secretary, Y. Kikheto Sema IAS liasü.
Kikheto-i kaketshirtem ayongzüka jembidang, “takok angutsü atema merangdang tali ajemalutsüla aser loktiliba tenzüktsüla. Nai koma ajemaludir, yamaji nü nem temoatsü talila agütsütsü” ta ashi.
College azüngtsü tenzükbaji pei wadang asoshi lenmang tenzükba ama lir aser tarutsü nung alizüng atongtsü atema tetsükdaktsü aika ajangtsüsa akümtsü, ta paisa ashi.
“Onük balala ajanga asen Naga nunger loktiliba mainer aser iba khuret ya asenoki koktettsüla. Asenoki asen loktiliba nung temelenshi bener arutsüla. Asenoki asen metokmeperi aser aibelentem agizükdi aser tamajung dang tamajung ta ashitsüsa tasü itdi. Iba sülen jiang asen loktiliba nung chichiba temelenshi adoktsü,” ta Y. Kikheto Sema-isa ayongzük.
Paisa, KSSU dang tanga kin indang kaketshir tentettem nungi tzü-mopung aser shiruru  wazüka ayutsü atema inyakba mapa tajung ajizüka benshitsü atema ayongzük.
Iba onük nung pai Angami Students Union-i lipoküm wazüka ayutsü atema mapa inyakba indang metetdaktsü.
Kikheho-isa election maparen indang jembidang, kaketshirtemi pei pei tesem nung oa election system merüktettsü atema osang prokshitsü aser mapa inyaktsü ayongzük.
Iba sentong nung KSSU-i Freshers nem tenüngsang agütsü aser külen Kohima Sumi Totimi Hoho-i takok anguba tetsür kaketshirtem nem tenüngsang agütsü. Tanü kaketshirtemisa NBCC-i ketdangsüa inyakba clean election tenangzükba agi.
Tanububa session nung Dr. Vinito Chishi, President, Kohima Sumi Hoho, Hekani Jakhalu, Advisor, YouthNet, Khehoshe Ayemi, Branch Manager, Impulse Marketing aser James Swu, Composer & Conductor, Music Lecturer, Patkai Christian College nungertem panelists liasü.