Noklak, March 03 (TYO): Nagaland Chief Minister, TR Zeliang-i tanü Naga nungertem dang Naga yimten tebilemtsü küm papikaya India sorkar den melatetteti aliba ya tatem küma latettettsü asoshi Naga nunger yimten teloktem aser nübortem ajak longjemtsüla aser adianu ama bilema putepa alitsüla, ta metetdaktsü.
Pai iba o ya Brehostibar anepdang Tuensang district kübok Noklak Town Council tenzükba sentong nung jembidang metetdaktsü.
“Asenok rongnung adianu ama bilema putepa aser longjema melira, asenok kodanga tashi itta makümtsü aser tangari asenok mezüngshitsü,” ta paisa ashi.
“Tang ya Naga yimten telok balala longjemer Naga nunger asoshi teti atema telemtetba ka bener arutettsüba mapang lir. Ajisüaka, asenok melongjemba ajanga tebilemtsü tulu adoker. Ato kilonser, Narendra Modi-i dena Naga yimten ya latettsüner saka asenok longjema maliba ajanga tebilemtsü tuluka kümogo, anungji asenok longjemtsüla,” ta T.R.Zeliang-isa metetdaktsü.
Naga nunger asoshi ibai kati ka aitsüteptsüba mapang masü saka Naga nunger asoshi yimten nung telatetba tajung ka bener arutettsüsa ajaki yariteptsüba mapang lir, ta paisa ashi.
” Asenoki azü tokshiba mapa peria ajangshiogo, asenok rara nung nisung taküm aika laluogo. Iba kasa timtemji asen chirnurtem nem ajangshidaktsüner asü ? Yimten tebilemtsü ya asen chirnurtem nem senmang ama yutsüner asü ?,” ta Chief minister-isa metetdaktsü.
Asenoki asen chinurtem asoshi yutsüba senmangji yimjung aser tejakleni otetba tensa mapang asütsüla aser ibaji tang asenok longjemer inyak nung dang akoktsü, ta paisa ashi.
Naga nunger kin balala rongnung yimjung alitsüla aser ano talisa Tuensang aser Kiphire district nung aliba kintem putepa alitsüla, ta pai metetdaktsü.
Town council tenzükba nükjidong indang ashidang, pei alidak peisasa terenlok mapa inyaka nübortem yaritsü asoshi town council tenzüker ta chief ministerisa ashi.
” State sorkari kechi nungsa yaritsü nüngdaker aser teyaritsü lenmang ali, item ajak nungi yaritsü saka ano Town Council purtemia town topur junga lenmang aser kilentsü nunger ama yanglutsü asoshi alimelen agiba lenmangtem nungi peisasa senotsü bushia inyaktsüla, ta T.R.Zeliang-isa metetdaktsü.
Town council ama yimten nung tetsürtem asoshi menden 33% shiteta yutsütsüba indang ashidang, iba ken o ya tangatettep nung latettsü asoshi sorkari Naga Mothers’ Association den jembidagi aser yakta telemtetba tajung agitettsü imlar ta paisa metetdaktsü. Iba sülen dang Municipal aser town council election agitettsü, ta paisa ashi.
Nagaland Municipal Act, 2001 nung ashiba agi, nütsüng yongsük 5000 nungi 20,000 tashi aliba town nung Town Council tenzüktsü akok. 2011 census nung Noklak nung nütsüngyongsük 7,674 liasü.
Noklak ya Khiamniungam nunger headquaters lir aser yangi Myanmar arrtsü anasa Pangsha nung International Trade Centre lapoka lir.
You must be logged in to post a comment Login