Naga nunger longjemtsü asoshi

Alima nung kanga longjema linür saka melongjemtetter ta asüba kinji Naga nunger asütsü. Ibaji tezüdangtsüka lir. Ajisüaka, jungjunga bilemdangra, Naga nunger ama kin tilala tapu aika aser kin shia oshi balala ta asüba kintem longjemtsübaji temela masü, anungji bilemba ama melongjemtetyonga tezümedangi Naga nunger ta asüba kin ajak putepa alitsü merangtsübaji Naga nunger ajak mulung nung khuretsa bilema inyaktsüla. Naga nunger ka küma longjemer alitsü asakbaji talisa alima yimten balaka kübok Naga nunger lushi lemsar aliba ya ajanga lir. Aji oda, India nungsa süaka state balala nung Naga nunger lushi lemsar yuja lir. Ano, iba dang nung jagi khuret tulubaji Naga nungersa süaka kar India nung aser karbo Myanmar (Burma) nung ta sükshia aliba timtem aser tebilemtsü ya asütsü. Aji oda, Mon district nung Longwa yimbo India o Myanmar na artsü anghbaer atepdak lir. Iba ama Naga nunger shisa tenük junga mesakdang tangari lemsaa yutsüba agi tanü tashi Naga nunger yimten ka kübok melitteti longjemtsü melena melongjemba melongjemba küma aoba angur. Talisa India tsüngdang asenok longjema sayutsübaji kanga nüngdaker, anungji lenirtemi kanga kümdanga nübortem lenchii oa anitsübaji kanga toingtibang mapa ka asütsü. Naga nunger longjema linür saka melongjemtetbaji Naga nunger nütsüng nübortem tai masü lenirtemsa tai asütsü. Aji oda, Naga nunger ajak ya kin ka chir ama yimten ka kübok külemi longjema linüba agi akhidang Naga Club tenzükba, Naga Peoples Convention sentepba aser tanü Naga Hoho tentetba mapatem ya asütsü. Atangji merangyonga tanü tashi Naga nunger kintem ajak longjema yimten ka kübok alitsübajibo yutsür lokti tentet ka küboka melitetter. Aji oda, Naga nunger asoshi yimten nüchiso angutsüba tebilemtsü dang nungibo lokti tentet ka kübok Naga nunger longjema alitsüba tebilemtsüang tuluba kümogo. Iba ama tia ka nung yimten telatetba kati aruyonga Naga nunger tebilemtsübo tamajungbaang küma aotsüa akok. Iba tangatetba nung kechisüdir süaka Naga nunger kin ajak longjema alitsübaji Naga nunger lenirtemi bendanga agüja inyaktsüla. Aji oda, Naga nunger lokti lenirtemi political party aser government kecha tsütsüa tejak meshitsüi shitak dang shitak aser tai dang tai ta shiteta Naga nunger anitsübaji kanga tongtibang kümogo. Nübortembo telok ka tsütsü mesüra ka tsütsü asütsü saka lenirtemibo telok ka tsütsü atsünga masü saka nübortem tsütsü atsünga len anitsübaji kanga tongtibang asütsü. Tanü asenok lenirtem dak tashi mait ka reprangtetbaji sorkari tarutsü lanurtem akoksatsüsa telemtetba tai ka agiyonga taia ta meshitetter iba jagi nübortemi mulung melemtetter aser telok tashi mait atener. Iba amaji mesüi tangatetba tajung nung lokti tentet kaji government kübok department ka amato masü saka government katang shisa tajung agüja anir telok amato alitsüla. Tanübo Naga nunger ajak tia majung külem yimten yimli ka kübok alitsü jembia jembia telok telemsa teimba-teimba kümdagi. Iba ya sottsüla. Atangji, iba ama Naga nunger rongnung telemsa adokba ya tashiyim agi sottsü mesüra nokdangtsü makok saka tangatetba agi sottsüla. Ibaji atema Naga nungertem ajuruteptsüla aser ajuruteptsü atema kari ayongtsüla. Iba tangatetba nung taoba hopta nung asenoki iba osangkaket nung ” Naga Hoho nung Naga kin ajak adentsüsa yanglushitsü nükjiong nung Angami Public Organisation-i Nagaland nung aliba Naga kintem mongdang ka tamasa ayongzük nunga koma süla ?” ta bilemdangogo. Atangji, APO-isa masüyonga Naga nunger telok tejangja kati Naga nunger ajak ajurutepa tebilemba ajak tokzüktepa jembitsü asoshi senden tajung ka ayongzüka akatsüla. Iba sendenji Kohima nungsa masüyonga, mulungtepra, Mon mesüra Tuensang ama ka nung alitsüa akok. Taginübajibo Naga nunger ajuruteptsüla, kechiyong ajurutep nung dang tejashi aser tepela ajak tokzüka jembitettsü aser  tangatettep kati arutettsü.