Naga nunger longjemtsü atema Chakhesang ketdangsertemi len aniang: Neiba Kronu

Kohima, Yimpoksüi (November) 23 (TYO): Tanü asen Naga kibong nung telongjem mali kümogo anungji Chakhesang ketdangsertemi Naga nunger longjemtsü atema len ania mapa inyakang ta Planning & Coordination and Land Revenue Minister, Neiba Kronu-i ayongzük.
SIRD Hall nung Chakhesang Gazetted Officers’ Association (CGOA) 20 buba general session nung o jembidang Kronu-i “Naga Hoho aser Naga civil society balala tashi mait lir aser külen Naga yimten tebilemtsü melatetba ajanga Naga loktiliba asoshi tayongzükba jenti ajurua lir” ta ashi.
Bendanga agütsüba ketdangsertem ishika dang aser külen sorkari transfer & posting atema khuret ajurur. Anungji, Chakhesang ketdangsertemi Naga loktiliba nung temelenshi nüngdakba bener arutsü atema nendaka aser bendanga agüja pei mapa inyaktsüla, ta paisa ayongzük.
Phek district nungi sorkar nung MLA pa dang lir anungji CGOA-i pa den yariteptsü atema Kronu-i mepishi.
Chakhesang nunger engineers aser doctors aikabo mali saka NCS aser NPS officers aika adokogo aser administration o ozüng dak sendakba maparen nung tongti shilem agir. Chakhesang ketdangsertemi yimtsüng rongsenkettsüng ajungkettsü atema temulung agütsütsüla, kechiyong yimtsüng indang rongsenkettsüng majungket tashi loktiliba tejakleni maotsü. Asenoki lenmang tajung yanglura aser power peria adokdaktsüra, tanga terenlok mapatem asenoki inyaktettsü, ta Kronu-isa metetdaktsü.
Kohima-Jessami, Chakhabama-Zunheboto aser Pfutsero-Phek dena Phek district kübok tongtipang highway tem kobi melii yanglushitsü, ta paisa shisem.
Sentong nung CGOA president Zhothisa Dawhuo-i Chakhesang ketdangsertem dang kechi mapa nung lemzüktsüdir kanga dang yakyaka aser asalentong tasentem atonga mapa inyaktsü atema ayongzük.
CGOA nung tang ketdangser 700 dak tema züngsema lir anungji loktiliba nung temelenshi bener arutsü atema mapa meranga inyaktsüla, ta paisa shisem.
Sentong nung Chakhesang Public Organization president Kekhwengulo-ia tajungshi o jembi.
Search Committee convenor Visielie Kezo-ia 2018-2020 atema CGOA ketdangpur tasentem shimba osang metetdaktsü.
President- Kuko Mero, vice president- Dr. Zavise Rume, general secretary- Kekhriezuvi Lea, joint secretary- Vekusheyi Rhakho, publicity & information secretary- Bedukho Chiizho, statistical secretary- Velhusalii Naro aser Keweko-ii Ritse – treasurer.