Naga nunger nüchi asü ?

Naga yimten nüchiso onük nung India den atsütepa arur, joko küm noklang jungdi asür, saka asenok ajak asoshi tia majung kaji, yimten nüchiso bushia-bushia asenok yiar amaiang küma aoba tensa tia aiben asenoki ajurur. India government-i Naga nungertem dak taochi maka reshikangshitsü asoshi India sepaitem yoka merenshidaktsüba marem, Naga yimten nüchiso melen agizüker amato India telongjem kübok state ka küma alitsü asoshi Nagaland state kümtet. Atangji, India telongjem küboksa süaka Nagaland state nem India temzüng arla 371 A ajanga agütsüba temeten aser tashiji Naga nunger asoshi temzüng balaka agütsür amai agütsüogo. Ajisüaka, Naga nunger tsütsü tamakok kaji, Nagaland state kübok Naga kin ajak maittet aser India temzüng nungsa süaka Nagaland atema arla kenyongi balaka yutsübajia asenoki junga meyipzüka mamshiteti aruogo. Ibayongji, tangbo linük temzüng arla 371 A nung Naga nungertem nem temeten balaka agüja liaka, Nagaland government-i pei li nung aliba rongsen agiteta mamshitetter aser pei sobaliba temzüng ozüng agi masü saka India temzüng ozüng agi ken o ajak high court aser supreme court nung dang bendanger. Aji oda, Nagaland state akümba agi Naga nunger nüchi küma pei lima agi nümadangtetdangteta alitsü melen, Nagaland agi nümamedangtet alitsüsa asenoki inyakteta lir. Nagaland state akümba ya, asenok asoshibo tashiyim amshia election agir government akümtsü aser iba government tashi nung pei inyaknütsü inyaktsü atema aküm ama, tetenzük nungi tanü tashi nung, Naga nungersa süaka, Nagaland nung alirtem yabo yiar amato election agitepogo aser tamachi amato mapa ajak tangar nem inyakdaktsür asenokbo mapaa maka aser chiyongtsüa maka ta kiburbo kibur ser nung alar amai liteper. Ano külen, Nagaland state akümba jenjang agi temulung masü Naga yimten nüchiso asoshi taküm ajak bendanga agüja nokdakertem rongnunga, telok pongo trok tashi lemsar alitsüsa asenoki inyaktetba ya nüchi masü tamachi mapa lir. Iba jagi tangari asenok aküm metsübu kümogo. Aji oda, külen India wako shitak songa yur India temzüng kübok election shitak agir aser India yimten nüchiso anguba anogomong shitak amonger, aser ano külen Naga nungertemi yimten nüchiso meshir ta asüba tensa tiaji Naga nunger asoshi kanga tia majung tensa mapang ka lir. Iba tia nung joko Naga nungertemi Naga yimten nüchiso asoshi jembitsüa tashi mali amato kümogo. Ibayongji, tanübo Naga nungertem rongnung shitakba Naga yimten nüchiso asoshi akanga nokdakba aser jembiba telok mali kümogo. Joko, kari India küboksa süaka tang dang nungi jenjang tajungba ka nung latetner aser kari India o Naga nunger tsüngda telongjem meraksai yimten tashiang lemsar bener. Iba ama tia ka nung India government-ibo taruba October ita tashi nungbo Naga yimten telemtetba agütsütsü terenemba lir ta angazüker. Ibayongji, Naga nungertemi maginüba terenemba aser telatetba ka magütsüdaktsütsü asoshi yakanü Delhi nung oagi Naga Students’ Federation (NSF) teloki lokti senden ka ayongzüka liogo. Asenok asoshi tebilemdangtsü aser tangatettsü kaji, yakanü NSF teloki ayongba Delhi senden nunga Naga yimten nüchiso jenjang angutsü tim ta raa jembirbo Sikh nunger yimten temeten asoshi jembir, Kanwar Pal Singh dang liasü. Iba amaji asenok tangatetba jenjang aser telongjem ya tangari bilemba amto masü, onsara tashi mait, anungji asenoki asen tetsüng ajetdanger yaktasa India den ken o tatem küma latettsübajiang tensa mapangia ajungshir. Atangji, yimten nüchiso anguba kin shinga pei kija atsü atsüdanger malir saka tangar kintem den külemi yaritepa alir. Iba kasaji Naga lima ya India kübok aliyonga maliyonga, India denbosa mepilai alitsü. Iba tangatetba nung Naga lima ya India kübok masü saka India den alitsüsa telemtetba kati arutsüla. Idangji dang, Tsüngremi aochira, Naga nungertem ya nüchi küma alitsü aser India-a anisüngzüktsü.