Naga nunger passport, wako temeja atema telemtetba magi: Rijiju

New Delhi, June 22 (Agencies): Naga telungpur telok, NSCN-IM nem passport temeja aser Naga nunger wako atema temelaba agütsü ta asüba osangji tai, ta shia tanü India sorkari iba telok den yimjung ken o maneni jembidar, ta metetdaktsü.
Yangi osangbenertem den jembidang Minister of State for Home, Kiren Rijiju-i,  “Naga nunger puti otsü balaka asübaji sorkari agizüker, aser iba atemaji inyaktsü. NSCN-IM den maneni ken o jembidar. Passport aser wako temeja agütsü ta asüba osangji tai,” ta metetdaktsü.
NSCN-IM-i passport temeja aser Naga nunger atema wako temeja meshiba sorkari agizükogo ta osangtem jembiba mapang ka nung Rijiju-i iba osang metetdaktsüogo. Nagaland nung telungpur khuret tembangtsü nükjidong nung yaküm August ita nung India sorkari NSCN-IM den tenangzüktep agia liasü, aser ibaji Ato kilonser, Narendra Modi-i, state nung yimjung bener arutsü atema putiotsü mera ka lir, ta jembia liasü.
Iba tenangzüktep ya New Delhi nung Ato Kilonser Modi, Home Minister, Rajnath Singh aser National Security Adviser, Ajit Doval nunger lia NSCN-IM lenir, T Muivah aser sorkar nungi interlocutor, R N Ravi nati sign asü.
1997 küm ceasefire tenangzüktep agiba sülen küm 16 tashi ken o 80 dak tema jembia aruba sülen iba tenangzüktep agia liasü.
National Socialist Council of Nagaland (Isaac-Muivah) ya Naga nung telungpur telok tuluba lir aser parnoki ceasefire kayonga arur, ano S S Khaplang-i aniba teloki maneni rarar aser yaküm June ita Manipur nung army amakdang sepai 18 tashi tepsetba ya par teloki inyak ta temulung melemi bilemer.