Naga nunger putiotsü balaka asübayong Framework Agreement agi: NSCN-IM

Dimapur, Luchii (December) 21 (TYO): Naga nunger putiotsü khenyongi balaka aser linük ana tsüngda tashi lemsatepa külemi liyonga aotsü ta asüba tangatetba nung ajemdaker India sorkar den Framework Agreement sign sütepba aser August 3, 2015 nü sangdong, ta NSCN (IM)-i tanü metetdaktsü.
Bodbarnü Pradip Deka-i osangkaket ka nung Deputy Security Advisor R.N. Ravi-i telungpur shinga den olemtep malitsü ta ashiba osang ka sangdongba sülen NSCN (IM)-i iba sangdong agütsü.
Ravi-i jembiba nungji Indo-Naga yimten tebilemtsü ya Indian Constitution mesüra Union of India kübok latettsü ama sayur. Indo-Naga yimjung olemtep ya July 1997 nung ceasefire alitsü sangdongba sülen küm aika tejakleni oa jembiyonga arudar. India sorkari Naga nunger putiotsü angatetba aser agizükba ajanga iba ya mapa küma inyaka arur, ta Ministry of Information and Publicity (MIP) sangdong nung shia lir.
“Yimten olemtep ya party shingaia pei ajangzüktsü atema bilema inyakba mapa ka mekümdaktsütsüla. Iba tangatetba jagi 3 August Framework Agreement, 2015 nung lateta aliba onüktem ashioktsür” ta parnokisa ashi.
Naga nungertemi akhümtsübu agüja mapa inyaker saka India sorkar pei ajangzüktsü bilema mapa inyaker. Telatetba kecha melii jenjang temaba nung, India adena orr aser putiotsü otsü nung telemtetba ka agitsü atema mapa meinyakra, India sorkari ashioktsür asütsü, ta MIP-isa shisem.
India sorkari tasü itta aser linük security atema bilema mapa inyaktsüla, kechiyong mitkar tashi amshia raraba ajanga mangatettep tuluba akümtsü aser anatsülen taküm aika lalutsü, ta NSCN (IM)-isa metetdaktsü.