Naga nunger rongnung taidokteper külemi inyakdi : Th Muivah

Bodbarnü Dimapur nung tayimtsü anendak (NSCN-IM) tongti zülur, Thuingaleng Muivah pela agizükba sentong nung agiba noksa angur.

Dimapur, August 11: Naga nungertem yamai dangbo malitsü, joko tesüibaji tesüiba südaktsüdi aser taidokteper külemi inyakdi, kechiyong tanü mapangba ya Naga nunger asoshi telemtetba agitsü mapang tajung ka aruogo ta tanü National Socialist Council of Nagalim (NSCN-IM) tongti zülur, Wb.Th Muivahi metetdaktsü.
Tanü Bodbar nü pa Delhi nungi arur tayimtsü anendak pa agizüktsü ataa alir nübortem den jembidang, India sorkari Naga nunger yimten otsü yabo tangar dang nungi kenyongi balaka ta angateta Naga yimten tebilemtsü ya teti asoshi tatembang küma latettsü asoshi India sorkari mulunga lir ta metetdaktsü.
Naga nungertem küm aika India sepaitemi reshikangshiba sülen India sorkari Naga nungertem ya sepai yoka merenshiba agi makoktsü anungji parnok den yimjung nung yimten ken o jembitsüla ta tangatetba kati aruba sülen Naga nungertemi India sorkar den yimjung nung yimten ken o jembitsü tenzük ta Muivah-isa ashi.
Paisa ashiba agi, Naga nunger o India nunger na tsüngda tangatettep tajung kati aruba ajanga August asem nü ken o jembia aotsü tamendakdak onük kar nung sign süogo, aser iba nungji amendaker nübortem dak dang yimten tashi ali nung nübortemi mulungba nung latettsü.
” Asenoki asen temenen nangzüktsü mapang tongogo, anungji asenoki temenen nangzükdi aser kati ka dang taitoktepdi. Kechi süiogo aji süiogo, joko Naga nunger asoshi telemtetba tajungtiba agitsü asoshi tanü mapangi bentsür aruogo. Asenok kati ka den taidok magütsütep tashi Naga yimten tebilemtsü ken o malangtettsü,” ta Muivah-isa metetdaktsü.
Nagaland kidanger state-tem indang ashidang, asenok parnok den tebilemtsü aika lir, saka parnok den meraratepi tangatetba nung kati ka timtem angateta ken o renemtsü mulunga dang lir ta NSCN-IM lenirisa ashi. Asenok teti kidangersa alitsü, anungji asenok külemi yimjung nung alitsüsa asenok o asenok na tsüngda tangatettep alitsüla ta paisa ashi.
Paisa tanü parnok agizüktsü asoshi nisung aika ataba ajanga parnok mulung kanga ajungshir ta pelaba ken o ka metetdaktsü.Naga nunger asoshi yimten telatetba ya yakta agitsü imlar ta paisa ashi.
Paisa tanü tashi Naga nunger yimten temeten asoshi raraba nung yariba Tsüngrem teka asoshi Pa nem tenüngsang agütsü aser Naga nungertem dang Tsüngrem mamatsü ayongzük. ” Asenok asoshi NSCN nung Tsüngrem tsübuba tir asütsü asoshi Isak ama ka moatsüba asoshi Tsüngrem tenüng sangdi, ” ta NSCN-IM nung mendenbuba Isak Chishi Swu nüng sanga metetdaktsü. Isak ya tang shirang yipten nung lir.
Tanü NSCN-IM lenir agizükba sentong ya Naga Hohoi ayongzük. Iba sentong nung tepela o jembidang, Naga tir P.Chuba Ozükümi August 3, 2015 nü Delhi nung renemba ken o ji 14th August, 2015 Naga Inpedence Day nung NSCN-IM leniri ashitsü imlar ta metetdaktsü.