Naga nunger scientist Dr. Sentitemsü süogo

Dimapur, Oct.31 (TYO) : Naga nunger rongnung Mathematical Science nung takutet mongin tesayur Asangma nunger  Dr. Sentitemsü mapang tatsüka shiranger yasüng Bangalore nung 10:15 ako shi nung alima nungi pilaogo. Pa arishi küm 30 liasü.
Osang ajanga angazükba agi, pa ya October 26, 2015 nü shiranga tenzük aser Colombia Asia Hospital, Bangalore nung anepalua liasü saka pa taküm mekümzükteti iba mozü kidang yasüng süa adok.
Asür Dr.Sentitemsü ya tanur asüdangyongi tenendak aser meranga azüngba aser peisasa pei taküm azüokteta aliba taküm liasü. Pa class 10 tatidang nunga Edith Douglas Higher Secondary School, Mokokchung nungi top 7 nung takok angu aser class 12 nung Sceince azüngdanga top 3 jenjang nung takok ngua liasü. Iba kasa college nungisa pa B.SC kanga junga renem aser Hyderabad Unversity nung M.Sc renemer külen Indian Institute of Science, Bangalore nungi Ph.D angu. Iba sülen ano Germany aser Israel tashi nung lia shisatsü bushiloka liasü.
Pa ya taküm küm nungi Institute of Mathematical Science, Chennai nungi ano shisa bushiloka inyaktsüba liasü. Angazükba agi, ano pa ya Indian Institute of Science and Technology, Gauhati nunga professor inyaktsü shimer liasü.
Asüng Deobar anüngdang pa mang Bangalore nungi Jorhat 2:00 ako shi nung atongtsü aser yangji Asangma Senso Telongjem, Dimapur purtemi mangji agizüktsü. Iba sülen pa mangji Asangma yimtaki bener atutsü aser yangji yimteni asür nem akümtsübu agüja sarasadem mapang ka agitsü aser iba sülen  par alidak Mokokchung town-i bener atutsü.
Par tsürabur Mokokchung town nung Alempang kiyong nung alir asünungji, yangji Hombar anepdang 10:00 ako nung pa den asü pila sentep alitsü.
Dr. Prof. Sentitemsü taküm alidang pa den sensaksemba osang tatsüka Tir Yimyim adok June 12, 2015 tapak asem nung angutsü.