Naga nunger senmang mesamadaktsüi linük yangerdi: MB Neokpao

Dimapur, March 21 (TYO) : Khehoi designated camp nung GPRN/NSCN-i 38 buba Naga Republic day benjung amung aser iba sentong nung tongti tesemdangerji GPRN/NSCN President, Gen Rtd, MB Neokpao liasü.
Asen jakdang alirtemi Naga nungerji shinga yimsüsüba mesüra yimli kübok maliasü ta angateta parnoki Naga nüjiso atema rarayonga aru aser iba senmangji asenoki agizükogo, anungji asenoki parnok tsüngsü nung anidaktsüla, ta tanü MB Neokpao-i ashi.
Nüjiso atema inyakba aser asen senmangji kuli maliba onük kar mesüra tiyazü olen kar ajanga samatsütsü makok, kechiyong Naga nungertemi nüjiso atema azü, asentzü aser rongsen jenti tenlaogo, ta paisa metetdaktsü.
Naga nunger tarutsüji Naga nungeri temulungtetba aser telemtetba ajanga yanglutsü. Lennirtem aser züngsemtemi pei taginüba aser nüngdakba nung ajemdaker telok ka nungi kati aotsü. Tashimaitba nisungtemi parnok sentsü melenshitsü akok saka ibaji par nija khuret lir, ta GPRN/NSCN President-isa shisem.
“Nisungtemi pei metokmeperi aser tim mesüi inyakba mapatem nembangtsü meranga mapa inyaker aser o jembir saka itemji ajanga linük nung terataba ang tali adokdaktsür. Iba, 36 buba Naga Republic Day nung ni Naga nunger ajak dang, asenoki asen meyong linük ka yangerdi aser yimten tebilemtsü khuret koktetdi aser Naga nunger shia indang tarutsü kümzüka yudi ta ayongzüker,”  ta MB Neokpao-isa metetdaktsü.