Naga nunger sobaliba takar asoshi nüma atangtsüla : Acharya

Deobarnü NEZCC Complex nung Nagaland aser Assam Angh, PB Acharya-i Spring Festival 2016  tembangba anogo nung Popular Music Night lapoktsüdang agiba noksa angur. Noksa nungsa  NEZCC Director Lipokmar Tzüdir angur.

Dimapur, March 20 (TYO) : Nagaland ama state tila ka nung kin shia pei indang sobaliba tsüngsang, ken aser otsü balala aliba atema nüma atangtsüla, ta Nagaland & Assam Angh, PB Acharya-i ashi.
North East Zone Cultural Centre (NEZCC)-i Dimapur nung Spring Festival 2016 ayongzüka amungba tembangba anogo nung ‘Popular Music Night’ lapoktsüdang Angh PB Acharya-i iba onük jembi.
Angh aser NEZCC chairman-isa Nagaland nung alirtemi pei sobaliba atema nümatanga bilemtsü aser sobaliba wazüka ayuba den külemi ajungkettsü atema tayongzükba agütsü.
Sobaliba maliba nisung kaji tashi maliba nisung ka lir kechiyong pa dak maitsü kecha mali, ta PB Acharya-isa ashi.
Tawa Art of Living-i Delhi nung World Culture Festival ayongzüka amungba indang jembidang, Acharya-i alima tesem balala nungi artistes 35,000 tashi sabang ka nung adenshir art & music uluba sayuogo, ta ashi.
Tawa Delhi nung Destination North East aser World Culture Festival nung Nagaland state nungi nisung 100-i shilem agiba atema Angh-i nümatanga bilemba olen metetdaktsü.
Linük nung sobaliba dak sendakba maparen nung North East Region jenjang temaba nung lir. India nung regional cultural centre rongnung NEZCC ya ka lir aser Spring Festival ajanga state 8 indang sobaliba sayutsü meranger, ta paisa metetdaktsü.
Dimapur nung alirtem dak alaka, Nagaland kübok tanga tesem nung alirtemibo iba sentong mangu, anungji NEZCC ketdangsertemi Nagaland kübok tesem pezü nung Spring Festival ayongzüka amungtsü atema sentong yanglutsüla, ta Acharya-i mepishia metetdaktsü.
“Mon, Tuensang mesüra Mokokchung mesüra Dimapur nungi pilar tanga tesem ka nung iba benjung ayongzüka amung nung ajungtsü. Iba asoshi nübortem dang nungi tebilemba meshia telemtetba agitsüla” ta pai ashi.
Deobar nikongtsütsü Arunachal Pradesh nungi Bro-Zai dance, Manipur nungi Dhol Cholom aser Thang-Ta Meibul, Nagaland nungi Warrior Dance, Assam nungi Bordioshikla aser Bihu Dance, Meghalaya nungi Wangala, Tripura nungi Hozagiri aser Mizoram nungi Cheraw dance tem sayu.
Deobar nikongtsütsü Alobo Naga and the Band aser Indian Idol Season 3 takok angur Prashant Tamang nungertemi shilem tajung agia Spring Festival 2016 tembang.
Spring Festival 2016 nung North East tesem nungi nisung 400-i shilem balala agi.