Naga nunger tebilemtsü onük kara latettsü: Naga lokti lenirtem

September 01, 2016 nü Naga nunger lokti tentet balala nungi teshimtet telok kati New Delhi nung Union Home Minister, Rajnath Singh ajuruba noksa nung angur. 

New Delhi, September 02 (TYO): 2015 küm July 16 nü Wuzu nung sepaitemi injang akahdang school tanur ana- arishi küm 13 tetsür, Aso aser arishi küm 14 tebur, Tuzali na tepsetba aser ano kiyim lanutsür, Esther yirutsüba tatalokba sülen Enquiry Commission tentetaka, aser Naga lokti tentettemi sashia longkak aitaka Major Surinder Singh-i aniba 46 AR C Company and Para Commandos nungi aibelener sepaitem anema temerenshi kecha magütsü, koba ajanga Assam Rifles temi kaketshir lenirtem amokmerentsü atema dang tasü itshiogo aser ochi temeten akhangertem nem legal notice agütsüogo, ta Naga Hoho General secretary, Mutsikhoyo Yhobu, Naga Students’ Federation Tir, Subenthung Kithan, Naga Naga Mothers’ Association Tir, Abei-u Meru, aser NPMHR Secretary General, Neingulo Krome nungeri külem sangdong ka ajanga metetdaktsü.
Iba dak sentakba nung Naga Hoho, Naga Mother’s Association, Naga Students Federation aser Naga Peoples Movement for Human Rights ama Naga nunger lokti tentettem nungi teshimtet telok kati India sorkar dang ochi temeten meshitsü aser Disturb Area Act- Armed Forces (Special Powers) Act agientsü atema Delhi-i arua liasü. Iba dak alia Naga nunger lokti tentettemisa Naga nunger yimtenren tebilemtsü tekaraba nung latettsü atema takhangba agütsü.
Iba dak sentakba nung Naga nunger teshimtet teloki India tenüng nung jembitsü asoshi Ato kilonseri lemzüktsüsang, Union Home Minister, Rajnath Singh September 1, 2016 nü ajuruogo.
Iba jakdang kasa teloki India sorkar Interlocutor, R.N.Ravi aser Minister of State for Home Affairs, Kiren Rijiju na den ajurutepa liasü.
“Item senden ajunga nung tongti ketdangsertemi tebilemtsü koktettsü atema AFSPA ji tajungtiba lenmang masü ta shiogo, aser kobi melii India sorkar review meeting alitsü, aser iba mapang nungji Naga lokti tentettem nungi teshimtet teloki akhangba onüktem atema o lemteptsü ta ashiba ajanga onok pelar,” ta sangdong nung shia lir.
“Ano Naga yimjung ken o dak sentakba nung India sorkari tang India nung tebilemtsü onük aika liaka Naga yimten ken o ji “kanga tongtibang” ta shiogo aser parnoki Naga nunger tebilemtsü onükji tekaraba nung latettsü atema inyakdar ta shiogo” ta Naga nunger lennirtemisa metetdaktsü.
Naga nunger lennirtemisa, Ato Kilonser, Th. Muivah den par tongti ketdangsertem ajurua parnok dang India sorkar den o lemtepba indang metetdaktsü aser yimtenren ken o tejembitak indang osanga asüngdangogo.
“Tangbo India sorkari Naga nunger litsütem ulushitsüji Naga nunger tim temeten lir ta ashiba ajanga onok pelar,” ta parnokisa ashi.
“Onoki iba maongka agia Naga nunger dang iba ya metetdaktsüner, küm aika asenok rongnung mangatettep jenti adokogo, aser item mangatettep aliba onüktemji tang nungi asenoki angatetteptsü memerangra, asenok tamajung nungi tamajungba küma aotsü. Anungji Naga nungertemi asenoki sasa alitsü aser tarutsü putu atema koma alitsü, ibaji shisadanga alitsüla. Asenok ajaki agizüktettsüsa India sorkar den yimtenren telatetba tajung ka yanglutsüla aser ibaji atalokra asenok den mapetba AFSPA aser tanga ozüng tesashitem asenok dak nungi agientsü,” ta lennirtemisa ayongzük.