Naga nunger telok temi Manipur nung lungkak aitba sentong ayongzüker

Imphal, February 01 (Agencies): Manipur nung Naga nunger telok balalai national highways noktangtsü atema sentong balala ayongzükogo.
All Naga Students Association, Manipur (ANSAM) aser Kuki Students Organisation (KSO) nati mapang tatakzük kecha melii gari lenmangtem noktangtsü ayongzüka lir, ano külen JAC-ia anogo pezünü ‘chakka bandh’ ayongzükogo.
United Naga Council (UNC)-i Manipur kübok hill district pezü nung February 4, 2016 ayaterm nungi ghonda 48 mokdangtsü ayongzükba sülen ANSAM, KSO aser JAC nungeria lenmang noktangtsü osang metetdaktsü.
JAC-i gari lenmang noktangba sentong ayongzükbaji tribal bill tem anema lir aser ibaji United Naga Council-ia pusema nungiter. Parnoki Manipur nung tribal area adena süiba highway aser national highway ajak noktangtsü ta osang metetdaktsüogo.
Kuki Students’ Organisation (KNO) aser All Naga Students’ Association, Manipur (ANSAM) nati külem sangdong ka nung state sorkari parnok taginübatem metongtsüba agi Hombar nungi mapang tatakzük makai lenmang noktanga lungkak aittsü, ta ashi.
Parnoki tamangba yimsü aser menoknok dak sendakba maparen inyaker, medical, electricity, water supply aser media nunger dang senzüsenbongtsü melatsü ta metetdaktsüogo.