Naga nunger teloktep sabang ka yangertsüla: Naga Hoho

Kohima, February 27 (TYO): Alima nung tanga linüktem amai Naga nungera nüchiso ngur longjema alitsü atema Naga yimtenren mapatong tenzüka liasü aser küm 70 dak tema Naga nunger India talenba nungi salatsü atema rara arur, ta Communication Cell, Naga Hoho-i sangdong ka nung metetdaktsü.
“Ajisüaka Naga nunger lenir aika Naga nunger taginüba atema masü saka India nunger taginüba atema inyaker. Naga nungeri teti atema yimjung aginüa küm 23 tashi yimjung ken o jembia arudar, ajisüaka tanü Naga nunger lenir kari tanü tashi nüburtem mangmadaktsür,” ta sangdong nung shia lir.
“Ken o jembirtemi India aser Naga nunger tsüngda sovereignty lemsatsü atema melungogo, ajioda 2015 küm August 3 nü India sorkar aser Naga nunger tsüngda Framework Agreement sign asü. Mangatettep onük Pan Naga Hoho (PNH) ya junga shisadangtsü nüngdak. Naga nunger renloktsü aser tarutsü nung Naga nunger longjemtsü atema Pan Naga Hoho ya sabang ka asütsüla, koba ajanga Naga nunger tajangzük angutsü. Pan Naga Hoho nung alibatem aser inyakyim mangatetti lokti tentet aser yimtenren party kari arendakba aser ashishiba ngua Naga hoho süngmanger,” ta kasa sagndong nung shia lir.
“Naga nunger tsüngda ano taliba telemsa adoktsüsa tezüngzüktep kecha Naga nungeri magizüktsü. State/area kar atema dang telatetba agira ibaji tazüngla asütsü aser Naga nunger loktiliba nung ano tebenja taliba adoktsü,” ta sangdong nung shia lir.
“Naga nungeri nüktzü aser azü agi takar senmang alangzüktsü nangzükbaji region ka atema dang masütsüla. Naga nungeri pei litsü ajak atema longjemer khuret bena aruogo. Anungji region ajak nungi Naga nunger longjemdaktsüba sabangji ajanga Naga nunger tashi aittsü,” ta sangdong nung shia lir.
“Pan Naga Hoho nungi adokba arok shisatsü ajanga Naga nunger taginüba ataloktsü. Pan Naga Hoho sabang nung ajak densema inyakyim latetba ajanga Naga nungeri Naga kibong ajungtsü atema tebilemtsü ajak koktettsüsa tashi tulu angutsü. Anungji Pan Naga ama sabang ka aliba ajanga Naga nungeri tashi angutsü aser nüchiso den terenlok angutsü,” ta Naga Hoho-isa metetdaktsü.
Naga nunger külem takar senmang ajanga Naga nungeri nüchiso angutsü, renloktsü aser azükarutsü. Tang aliba maongka agitettsü atema region balala nungi Naga nunger longjemer tashitait Naga nunger teloktep ka yangertsüla,” ta Naga Hoho-isa metetdaktsü.