Naga nunger telungjem asoshi kaketshiri yakbang sür inyakdaktsünür: G. Kaito Aye

Alakteta jaoker Minister G. Kaito Aye den sentong nung tongti shilem agirtem, AKM officials aser tangartem kar noksa nung angur. Khar, January 16, 2020.

Mokokchung, Jan 16 (TYO): Aorji samanir kin ka lir, anungji, samanir kin ka ama telemtetba tajung agir Naga nunger lenla ajak nung maneni len anitsüla, ta ashi. Iba o ya Jan 16 nü Nagaland Agriculture and Co-operation Minister, Wb. G. Kaito Aye-i 68 buba Ao Kaketshir Mungdang (AKM) lokti senden sentong nung alakteta jaoker ka ama Khar yimdak jembidang mungdangsangertem ayongzüka metetdaktsü.
Paisa ashiba agi, kaketshirtemi shisashiba wadang bushidang pei nükjidong mamatoki tebilemba matalok tashi meranga azüngtsü aser iba denji taküm lia aotsü atema pei sasa tepok sünga litettsüsa mapa meranga inyaktsü ajungshia liasü.
“Ao kinji Naga nunger asoshi samanir lir, ano maneni yamaji odaktsünür aser tanüngba Naga kin shirnok tepetzük tia nung lir, parnokjia anioka lirumedema ajungkettsütsüla”, ta paisa inyakdaktsünüba o ka ashi. “Samanir kin ka ama telemtetba shitak agir tanüngba Naga kinji maneni len anitsüla”, ta paisa shisem.
Paisa lungjema alitsü asoshi onük kar lemsatepdang, “tang ya Naga nunger solution atema inyakba mapang ka lir, anungji, tebilemtsü onük tilatertemji toktsür Naga nungeri aginüba ama telemtetba agitettsü asoshi kaketshiri yakbang sür telungjem asoshi inyakdaktsünür”, ta ashi.
Naga nunger aser talisa Ao kin nungi joko UPSC nung takok nguteter ajema akümba angur aser lenmang kar nung lulaa aoba ajiteter, anungji, Ao kin taoba mapang wangshibatem khen lepa reprangshitsü nungdaker, ta paisa ashi. “Naga nunger tejakleni aotsü asoshi Ao kin teyariji nungdaker”, ta paisa shisem.
Sentong nung Nagaland Rural Development Minister Wb. Metsübo Jamir, Ao Senden tir Wb. Chubawati Longchar, Naga Students’ Federation tir Sb. Ninoto Awomi, AKM tir Sb. Imkongwati parnokia salem o den tayongzükba o tulu bener arua mungdangsanger ayongzüka liasü.
Kasa anogo nung shisatokden sentong ka liasü aser iba nung Nagaland Industries & Commerce, Labor & Employment, Skill Development & Entrepreneurship Advisor Wb. Imnatibai tayongzükba o den Watsü Mungdang tir Wt. Maonginlai salem o tulu lemsatep. Nagaland University nung tesayur Prof. B. Kilangla Jamir, MCCI tir Wb. Tsükti Longkumer, ILANDLO Director Wb. Imtisünep Longchar parnoki “Rongsen tajangzük luyim nung yaretba asoshi koma süngsashitsüla” onük dak ajemdaker tagitsü shisa tajung aika bener arua tokdena yutsü.
68 buba AKM lokti senden ya Khar yimdak amunger aser iba sentong nung kaketshir tejaoker meyi ana dak tali arua shilem agia mungdaki. Iba sentong ya January 17 aonung tembangtsü.