Naga nunger tenüng amshia Hotel melapokdaktsütsü: NHRA

Dimapur, June 23 (TYO) : Bendanger nem Naga nunger tenüng nung Hotel aser Restaurant melapokdaktsütsü, ta Nagaland Hotel & Restaurant Association (NHRA)-i tan senden nung lemtetogo, ta NHRA sangdong ka ajanga metetdaktsü.
Bendanger shishilembaba license nung Naga nunger shibai pei tenüng amshidaktsüdir pei akoksa asütsü kechiba süra NHRA-i iba amala inyakyim putetra tapet temerenshi agütsütsü, ta parnoki ashi. Business Association of Nagas, Youth Association of Nagaland aser lokti tentet ajaki bendangeri Naga nunger tenüng amshiba inyakyim nokdangang, ta NHRA-isa ashi.
“Trade license nung pei tenüng shitak inoka alir Naga nunger mesüra bendanger meyong shishilembaba mapa kecha NHRA-i nokdanga mali,” ta kasa sangdong nung shia lir.
Bendanger shishilembar kari Naga nunger tenüng amshia shishilembaba tesem lapoka lir aser item tesem nung ozüngi memelaba mapa aika inyakba NHRA nguteta lir, ta sangdong ajangasa ashi.