Naga nunger tetemjen mapang nung telemtetba shitak agitsü tia ka ajurua lir

Dimapur, October 17 (TYO): Naga nungertem koleni aotsü ta asüba asoshi telemtetba ka agitsü mapang ka ajurua lir. Asenoki mapang shitak nung telemtetba shitak agitsü asü ano tangar nem asenok maneni ajemshidaktsütsü ta asüba tia ka ajurua lir, ta GPRN MIP-i sangdong ka nung metetdaktsü.
Atangji iba ya Naga nunger asadangtsü mapang ka lir aser alimai asen reprangdar. Ajak dang tematiba, Tsüngremia Naga nungeri koba tashi ka nung Naga putiotsü timi ayur ta tenük yokdar, ta parnokisa ashi.
Iba ama mapang ka nung, Naga linük kümzüka ayutsü atema bendanga agütsütsüla. Kija ajaki Naga linük kümzüktysü atema külem sabang nung adentsüla. Lennirtemia tanga lennirtem den külemi Naga linük kümzüktsü atema ajemalutsüla, ta MIP-i ashi.
Asenoki aiben nisung meyirjang aikati taküm bendanga agütsüba indang jembir saka asenoki parnoki tenla ajanga India sorkar den ya tashi olemtepa arur ta asüba mejembir, ta MIP sangdong nungsa shia lir.
India sorkari tanen makai Naga nunger mesüra teloktem senotsü aser tanga economic packages ajanga mesüzüktsü meranger. Ajisüaka, item ama khen atema tajangzük anguba ya Naga lima asoshi taküm tenlartem— Naga putiotsüji yangi metembangtsü aser asen chirnurtemi asenok tamakoktem atema tasüngdangbatem asüngdangtsü.
Tia maka, asenoki san tanak aikati media nung osang balala züluba angur aser ano civil society group kari India Prime Minister-i latettsüba mapang tsüngda tenangzüktep agitsü atema ola adokba angashir. Ajisüaka, item taitsü aketba nisungtemi Naga nunger putiotsü aser yimten temeten kümzüka ayutsü atema mebilemer, ta
Parnoki Naga nung konang aser maitsü anema inyaker, anungji Naga nungeri atakatem masüdang tangatetba meyipa reprangshitsüla. Kechiyong iba ya küm 70 tema tejaklen Tsüngrem Naga nunger nem tongnüsen indang wako agütsüdang Pa den tenangzüktep den sendaka lir, ta MIP-isa metetdaktsü.