Naga nunger wako & temzüng

Nagaland angh aser India government tenüng nung Naga yimten nüchiso bushir teloktem den jembir R.N.Ravi-i pa angh kümli Naga yimten tebilemtsü tatem küma latettsü asoshi ato kilonser Narendra Modii ita asem agüja lir ta metetdaktsüba mapangji tang October ita nung temadoker. Tetezü, center government-i bilemba amaji Naga yimten tebilemtsü ya tatem küma latetdi süra, joko anogo metsü shi dang lir. Atangji, iba anogo 20 tsüngdaji telemtetba katibosa arutsü südi ta ajaki imlaseta atar. Tang tashi nung India government o Naga nunger yimten nüchiso bushir teloktem na tsüngda tangatettep kati arutettsüsa Naga nungertemi atsüanem akabaji, India kübokbo India kübok alitsü saka Naga nunger wako aser temzüng balaka aginür. Ano, Naga nungertemi atsüanem akaba onük kaji, Naga nunger lushi ajak Naga yimten ka küboki maityonga Naga nunger aliba tanga state ajak nung Naga nungertem sademsadema alitsüsa yimten tashi balaka agütsüdaktsüner. Atangji, Naga yimten nüchiso asoshi raradang taküm, mapang aser rongsen aika laluogo. India sepaitemi reshikangshiba aser mezüngmeshiba mapatem ano yashiang atalok ama Naga nunger mulungjang nung lir. Ibaji dang masü saka Naga yimtenbo Naga yimten nüchiso asoshi rarartem saka Naga nunger o Naga nunger na tsüngda yiar ama azütokshitsü tenzükba agi Naga nunger senti taküm aika samaogo. Naga yimten nüchiso anguyonga item takümtemji kecha agia memenoktettsü. Ajisüaka, tanübo India den Naga yimten nüchiso asoshi jembibaji tamakoktsü ka kümogo. Ibayongji, yimten nüchisosa mesüaka Naga nunger yimten temeten mesamai ayutsü atema Naga nunger wakobosa amshitsü aser temzünga balaka lateta ayutsü ta sünür südi.  India government-iang ibaji angateta agizüktsü imlar. Atangji, yimten nüchisobo mangu saka wako aser temzüng balaka amshitsübaji yimten nung inyakyim balaka asütsü aser iba jagi alima nung Naga kin mesamai jangjatsü. Atangji, tanüa India temzüng nung süaka Nagaland nung alir Naga nunger asoshibo arla balaka, arla 371 A  nung temeten agüja lir. Iba temeten jagi Nagaland nung aliba rongsen aser sobaliba kümzüka ayur. Iba amaji ka, temzüng kaket balaka nungsa mesüaka, kodang Naga yimten telatetba kati arudir, idangjibo tang aliba Nagaland state nung alir Naga nunger asoshi dang masü saka kidanger state-tem nung aliba Naga nungertem asoshia dena temeten lateta yutsütsü imlar. Naga nunger wakojia India government kübok aliba office-tem nung mamshiyonga, Naga nunger yimten, loktiliba aser sobalibaren dak sendakba maparentem nung amshitsüsa telatetba tajug kati arutettsü. Atangji, koba yimten telatetba kati arudir aruaka, tongtibangtibaji iba telatetbaji nübortemi agizüktetter asü magizüktetter ta asübaji asütsü. Atangji, Naga nunger yimten nüchiso bushir teloktem rongnunga karibo Naga yimten nüchiso jenjang dang nungi tilaba aser teküpbokbabo magizüktsü ta tang tashi akangakanga nokdakertema lir. Ibajia shitak saka rarararaa Naga yimten nüchiso jenjang ka latettsübaji tasakba kümogo ta asenok ajaki angatetter. Ibaji, talisa, asenok tashimait akümba agi asütsü. Anungji, asenoka asenok tashimait jenjang aser tia ya meteta tamakoktsü ka atalok atatsü agibo, kechi takoktsü lir, iba takoktsüba jenjang nungji tajungtiba jenjang ka latetang tajungba ta ajaki angateta inyaktsü junger. Iba tangatetba nungji nübortemia tejembirtemi koba tashika jembiteta bener arudir, ibaji pelashishia agizüktsü renema atatsüla.  Koba lima nung koba yimli südir khen amabosa teti malitsü, anungji India telongjem yaa mapang kabo raksaa adoktsü. Ashiko, Naga nunger longjema lira, tarutsü nung iba ama India telongjem, USSR ama, raksaa aoba mapang nungang Naga nungertema yimten nüchiso anguba kin ka küma Naga nunger lushi ajak Naga yimten ka kübok alitsüsa mapang tajung ka arutsüa akok. Iba ama mapang ka maru tashibo yimten nüchisosa manguyonga asenok tangatettep nung longjema alitsübajiang tongtibangba asütsü.