Naga nunger yimsüsürtem Kaziranga nung mamongtsüla : JCC

Dimapur, July 11 (TYO) : Tang Nagaland nung yimsüsürtem rongnung mepetmesü adoka aliba ken o ya Nagaland nungsa latettsüla aser Kaziranga nung oagi amongba sobaliba ya endoktsüla ta Joint Co-Ordination Committee (JCC)-i metetdaktsüogo.
Tanü Mongolbar nikongdang Chakhesang Hoho building, Dimapur nung Naga kin telongjem tentet shia nungi lenirtem jaoka senden ka aliba sülen JCC lenirtemi osangbenertem den jembidang iba o ya metetdaktsü.
Naga nunger lenirtem shirnoki Naga nunger aküm aser sobaliba kümzüka yuner, parnoki iba ama sobaliba tamajung mebenshitsüla aser nübortem meyong senotsü endoka Kaziranga nung mamongtsüla ta parnokisa metetdaktsü.
Parnokisa Nagaland government dang Januray 31, 2017 aonung Dimapur nung nisung ana khasetba indang bushisüngdangtsü asoshi Joint Investigation Committee (JIC) ka tentettsü takangba agüja alibaji yaktasa mapa küma inyaktsüla aser Nagaland Municipal Act indang November 24, 2016 anogo nung Nagaland Legislative Assembly nung lemteta aliba telemtetbaji agientsüla ta metetdaktsüogo.
JCC-isa shisalemsateptsü purtem shisalemsateper yaktasa Municipal Act 2001 ya reprangshia yanglushitsüla ta takangba ka nenshia metetdaktsü.
Ajisüaka, T.R.Zeliang chief minister akümtsü merangba maparen dak sendakba nungbo JCC-i kecha mashi.