Naga nunger yimten jenjang tasen ka latettsü

NSCN (IM) collective leadership nungi züngsem 15-i Nagaland Governor RN Ravi den tangokba noksa nung angur. 

New Delhi, October 31 (TYO) : India ato kilonseri Naga yimten tebilemtsü ya tatembang küma telatetba kati arutsü asoshi ita asem lateta yutsüba tesüsaba anogo, tanü October 31 nü India government o National Socialist Council of Nagalim ( NSCN Isak-Muivah) na tsüngda tangatettep kati aruogo.
Iba yimten tangatettep ken o indang ya ano tejangjabo memetetdaktsüi lir saka Naga nunger temzüng balakabo malitsü aser Naga nunger wako (flag)-bo lokti tentet aser sobaliba maparen nungbo amshitsü melatsü mulungtepa agizükogo ta angazüker. NSCN-IM teloki India government dang Naga nunger temzüng balaka alitsü aser yimten mapa nung Naga nunger wako amshitsü ta akangba onük Indiai magizüktetba agi yashi tashi parnok tsüngda telemtetba magiteti liasü.
Kasa Naga yimten tebilemtsü onük nungsa, Naga nunger yimten nüchiso bushir tangar teloktem telongjem, Naga National Political Groups (NNPGs) denbo yimten ken tangatettepi arur liasü, saka NSCN-IM telok den tangatettep kati marutetba ajanga NNPGs telok dena ken o renema mejembii lir, kechiyong Naga nunger yimten nüchiso bushir telok balaka aika liaka, India government denbo tangatettep onük ka nung dang renemtsü.
” Onoki ken o tembanga renemtsü asoshi agizükogo , saka wako aser temzüng dak aketba onüktem tarutsü nung maneni jembia aotsü,” ta NSCN (IM) lenir kati iba osangbener den jembidang metetdaktsü.
Atangji, ken o bo angatettepogo saka tangatettep onüktem jungjunga reprangshir külenang sign asüba sentongbo agitsü ta NSCN-IM lenirisa ashi.
Tang NNPGs aser NSCN-IM den India government tangatettep ken o renema aliba nungji tang aliba Nagaland state nung tatar hoho ana alitsü aser tatar mendena tang aliba dang nungi teimba asütsü.
Ano, Naga nunger alushi yimten ka kübok melongjemtetaka, sobaliba ajanga longjema alitsü asoshi Naga nunger ajak adenba lokti telongjem ka, pan Naga Hoho tenzüktsü aser iba lokti tentet office maparentem nung Naga nunger wako amshitsü ta angazüker.
Kasa telemtetba onüktem nung Manipur, Arunachal aser Assam nung alir Naga nungertem asoshia yimten jenjang tasen kaka agütsütsü terenemba lir ta angazükogo.
Naga yimten tebilemtsü onük ya tatembang kati arua jembitsü asoshi 1997 küm India government o NSCN (IM) na yimjung lapok aser iba sülen 2017 küm NNPGs dena yimjung lapoka liasü.