Naga nungeri Centre dak dang meimlatsüla: Swu

Kohima, Jan. 14 (Agencies): Nagaland Roads & Bridges Minister Y Vikheho Swu-i, Naga nungeri Centre dak dang meimlai pei sasa inyaktetba ajanga pei peria litettsüsa meranga inyaktsü mapang tongja tongogo, ta Bodhbarnü ashi.
“State senotsü shilem 90 dak tema Centre nungi arur. Centre-i state nung NITI Aayog mesüra maongka balaka agütsübaren nung telemtetba tejangja magütsüba ajanga dang masü saka asenok sasa sen arulen tsütsü kecha meinyaktetba ajanga rongsenkettsüng jenjang tamajung ka nung lir,” ta Swu-i ashi.
Pai iba o ya Zunheboto district nung Pughoboto sub-division kübok Asukiqa nung 44buba Sumi Aphuyemi Kiphimi Kuqhakulu (SAKK) senden nung kaketshir aser yimtaklirtem den jembiba mapang ashi.
SAKK ya Pughoboto sub-division kübok yim 24 nungi kaketshir telungjem tentet ka lir.
Iba senden ya ‘Retrospection our footprints’ nung ajemdaker ka-a liasü. Kaketshirtem aser sorkar mapa inyakertemi yimtsüngtem nung oa yimtak inyakyim nung nüngdakba temelenshi bener arutsütsü nüngdak koba ajanga yimtsü terenlok tali shisangtsü, ta minister-i ashi.