Naga nungeri ‘Külem Sabang’ ka nüngdaker: Nuklutoshi

Kohima, June 28 (Agencies): Naga nunger lenjem nung nokdaka lir aser asenoki tanü tensa mazüokra asen tarutsü tia kanga majung asütsü, ta taoba National Highways Minister aser tang Adviser to Chief Minister teinyakdak, Nuklutoshi-i tanü ashi.
Naga nunger atema “Külem Sabang” ka nüngdaker aser iba sabangji meyangertet tashi, Naga nunger lemsar aliba ya melongjemtettsü, ta paisa ashi.
“Tarutsü nung pei chirnurtemi ajurutsü aliba tiaji taintemi metettsüla. Kasa mapang nung lanurtemia iba tensaji meteta alitsü tim. Naga tebilemtsü ya mapang shitak nung mekoktetra, Naga nunger tarutsüj tiaji kanga tamajung asütsü” ta Nuklutoshi-isa metetdaktsü.
“Asenok tsüngda telemsa onsara adoka lir. ENPO tesemtem atema ENPO lir, kin asem atema CNTC lir, kin kar atema NTC lir. Asenoki kaketshirtem tsütsü reprangdangra, ENPO tesem atema ENSF aser iba sülen NSF lir. Naga yimten teloktema aika lir aser parnok kar India sorkar den ceasefire lir. India sorkar den yimten olemtep alibajibo NSCN(IM) dang lir” ta paisa shisem.
“Anungji, tanü asenoki ‘Külem Sabang’ ka nüngdaker aser iba jagidang Naga yimten tebilemtsü atema teti atema telemtetba tajung ka agitettsü” ta paisa ayongzük.
“India sorkari ENPO nunger den mapa inyakba nung taitsü keta lir, kechiyong India sorkari ENPO nunger dang “Frontier Nagaland State” ta ser state balaka agütsütsü ta nangzük. Ajisüaka, ano külen India sorkarisa Naga yimten tebilemtsü atema telemtetba agitsü atema sendaktepa alirtem ajak anioktsü ta jembir” ta Nuklutoshi-isa ashi.
“India sorkari Naga yimten tebilemtsü atsülangtsü atema lemsar yimsü asütsü meranger ta asenoki ashitsü akok. India sorkari tiyazü tenangzükbatem magii, ENPO-i takhangba agütsüba atema o shitak jembitsüla” ta paisa ashi.