Naga nungeri lenmang yangludang amshiba JCB ka apu

Mariani, November 20 (Agencies): Assam-i Nagaland den arrtsüa aliba tesem nung JCB ka apuba sülen tensa mejungi lir.
Jorhat district kübok Dissou forest area nung gari lenmang atuba nung amshi ta tai tonglokja JCB ka apu.
Naga nungeri ‘protected area’ ka nung yangluba gari lenmangji Assam ali lir ta Assam ketdangser kati ashi.
“Naga Basti-i aoba gari lenmangji Assamese ali nung yanglu. Onoki iba gari lenmang tusaogo aser gar mesenzütettsüsa arokaroka tua lir. Miim osang ka ajanga onoki iba gari lenmang yangluba osang angazük aser forest ketdangsertem anir iba tesem tonga ao. Onoki JCB apu aser driver o handyman dang asüngdangya südar” ta paisa ashi.
JCB driver Dadu Hazarika dang asüngdangya asüdang Nagaland nungi nisung kati ashiba ama lenmangji yanglur ta pai ashi.
JCB kiburji Jorhat district kübok Madhopur nung alir Prasad Saikia lir.
Krishak Mukti Sangram Samiti (KMSS) aser All Tai Ahom Students Union (ATASU) dena telok balalai Nagaland anema rongsenkettsüng mokdanga lir. Parnoki Jorhat nung Mariani-Nagajanka road mokdanger.
November 10 nungi Jorhat Forest division nung Mariani Range kübok Dissoi Valley Reserve Forest nung Nagaland administration-i ali atsünga agiba anema parnoki lungkak aiter.
State sorkari nungita Nagaland police-i Nagajanka nung ki ka yangluba azüngtettsü memulunger aser Assam police-ia iba anasa ali atsünga magidaktsütsü atema tesep ka amentetogo.
Tawa tu All Assam Students Union (AASU) indang Jorhat unit-i Assam Police ajungmesotsü atema iba tesem semdangogo. Külen, Nagajanka nung alirtemi ozüng alema inyaktsü amokmerenogo.
AASU-ia rongsenkettsüng mokdangtsü amokmerenogo aser külen Assam Tea Tribes Students’ Association-i Deobarnü ghonda 12 mokdanga liasü.