Naga nungeri mokdangtsü ayongba nung HC tiyongi aiter

Imphal, November 25 (Agencies): Manipur nung aliba Naga nungertemi National Highway ana mokdangtsü amokmerenba sülen Hokolbarnü Manipur High Court-i, Director General of Police aser Chief Secretary densema ketdangsertem dang National Highway ana nungji security mera agitsü tetuyuba agütsüogo.
Manipur anema mapang telatet ka makai rongsenkettsüng lenmang nokdangba telok, United Naga Council (UNC) nung tongti züngsem ana chiokang mesüra khenyongi mokdangtsü, ta Naga nungertemi amokmerenogo.
Hokolbarnü Manipur High Court nung Chief Justice Rakesh Ranjan Prasad, Justices N. Koteshor aser K. Nobin nungeri akümba full bench-i Manipur sorkar dang, khu abenba truck garitem aser totzü abenba tanker tem senzüba nung timtem malitsü atema National Highway anaprong nungji police aser paramilitary sepai peria yokang, ta tetuyuba agutsüogo.
Naga nunger ali temeten agia Sardar Hills district tentettsü sentong aliba anema November 1 nungi UNC-i rongsenkettsüng lenmang mokdangdar. Iba ken o ya maneni December 1 nü angadangtsü.
Police-i UNC Tir, Gaidon Kamei aser Information Secretary, S. Stephen na Hokolbarnü Imphal district kübok Pheidinga nung puogo. Tenaji Senapati district nung aliba UNC tongti office-i aodang apu.
Osangbenertem senden nung Manipur nung All Naga Students Union Tir, S. Satang-i, kecha telatetba ka makai tenaprong chioktsüla, mesüra khenyongi mokdangtsü ta metetdaktsü. Iba tetezü National Highway anaprong nungji ainlen jajartem aser nija gari ajak nokdangtsü.
Satang-isa, district tasen ka tentetba nungji kecha tashishitsü mali, ajisüaka ibaji Naga nunger den angatettepa inyaktsüla, ta ashi.
Highway ana nungji khu abenba trucks aser totzü abenba tankers mokdangba ajanga tang Manipur nung osettsüset nung jenjang kanga tuogo, aser black market nung petrol bo litre nung sen 300 tashi agi ayoker.