Naga nungeri nokdangba agientsü: Biren Singh

Imphal, March 15 (Agencies): Bodhbarnü Manipur nung Chief Minister tasenba, N. Biren Singh-i, pa atema mezüng teinyaktsü mapaji state nung United Naga Council (UNC)-i rongsenkettsüng lenmang mokdangba agientsüba asütsü, ta metetdaktsü.
Tanü Raj Bhavan nung tenangzükba agiba sentong tembangli osangbenertem den jembidang pai iba osang metetdakja liasü.
Yaküm November 1 nü nungi tenzüka UNC-i mapang telatet ka makai Manipur-i aoba National Highway ana mokdangba ajanga state nüburtem kanga timtemdar.
Naga nunger aika aliba tesemtem nung taoba Congress sorkari Sadar Hills aser Jiribam district tentetba anema UNC-i longkak ait tenzüka liasü.
State assembly election atema nüboyimdang BJP bangdak lenirtemi, party-i Manipur nung sorkar kümra ghonda 48 tsüngda mokdanga aliba ya agientsü, ta nangzüka lir.
Iba mapa ya temelaba akümtsü akok, kechiyong tang Manipur nung BJP-i aniba sorkar nung Naga People’s Front densema lir.
Ajisüaka ano Imphal nungi tanga osang ka ajanga ashiba agi, UNC-i iba mokdangba magientsüa akok.