Naga nungeri tajung tamajung bendangba nung Aor yakbang asütsüla: TR Zeliang

August 02, 2016 nü Imkongmeren Sports Complex, Mokochung nung Tsungremmong amungdang tongti tesemdanger, Chief Minister, T.R. Zeliang-i jembiba abelen noksa nung angur. Ajichilen noksa nung sobaliba telok balalai yar tsüngsangba angur.

Mokokchung, August 02 (TYO): State nung lenla ajaklen terenlok alitsü atema nisung shia melungsentsü melenshitsüla, ochishia alitsüla, kechiyong tangatetba, teyaritep aser lokti nung nübur medeni kecha temelenshi malitsü, ta tanü state Chief Minister, T.R Zeliang-i metetdaktsü.
Pai iba o ya August 2, 2016 nü Imkongmeren Sports Complex, Mokokchung nung Ao Senden-i ayongba aser North Eastern Council (NEC)-i sponsor asüba Tsungremmong benjungmung nung tongti tesemdanger o jembidang ashi.
Aortem dang Tsungremmong salem bena Chief Minister-i, “Tribe ajak benjumgmungji  alima den sentaktepa lir. Iba amaji  Tsungremmong ji pei taküm aser lokti meshiteta alu junga arutsü atema Tsüngrem temoatsü meshiba benjung lir. Anungji asenoki alima wazüka ayutsüla aser akhümtsübutsüla,” ta ashi.
“Kentena aser tsüngsanga  benjung amungba ajanga asen sobaliba balaka asüba sayur aser asen maitsü kümzüka ayur. Asenoki asen sobaliba wazüka meyura itemji samadoktsü,” ta paisa ashi.
T.R Zeliang-isa, Naga lokti nung Aortemji lenla aika nung mezüngpurtem lir, anungji Naga nungeri tajung aser tamajung bendangba nung parnok yakbang ser yaritsüla, kechiyong Naga nungeri loktiji shibai aser kechi ajanga raksatsür’ar jangjatsü mapang tongogo,” ta ashi.
Paisa,  Aor tebu teditem khuret tulu lir, anungji Naga lokti nung tambutisang ama inyaktsüla, aser iba atema milen amerji Ao Senden ser asenok melenshitsü atema Naga nunger anitsüla, ta ashi.
Kasa sentong nung tetushi tejaoker, Alemtemshi Jamir, IAS Retired Chief Secretary-ia, “Naga nunger sobaliba nung meshimetsüba aser rakzükratemba maliasü. Asenok taküm alitsü atema mapa meranga inyaktsüla.  Asen sobaliba asentenshia asenoki meranga inyak nungang Naga nunger mangdang ataloktsü,” ta ayongzük.
Kasa sentong nung Minister Nuklutoshi, Parliamentary Secretary, C. Apok Jamir aser NEZCC Director, Lipokmar Tzudir nungeri Tsungremmong osang aben.
Ao Senden Tir, Imolemba Jamir-i lokti pela agizük, Ao Senden PEC züngsem, A.Bendang Pongen-i Tsungremmong teratet ashi aser Ao senden tatong Tir, O. Shilu Jamir-i tepela anküp o jembi.
Ano Assam, Eastern Nagaland Peoples Union Mokokchung, Sumi union, Lotha union, Tenyimia union, Gorkha union Mokokchung aser Aosungkum cultural club Mokokchung sobaliba teloktemi shilem agi aser Ungma Village council-i arr atsütepba sayaa liasü.