Naga nungeria Hindu nunger benjung amongtsü asü ?

Tawa tu WhatsApp telok ka nung Dimapur nung Hindu nunger Janmashtami amungba indang noksa kar angu aser iba ya parnoki yimdong sema senzüdang agiba noksatem liasü. Noksa nungji nisung kari Hindu Seva Samiti, Dimapur ta tezüluba ama lir aser ibaji ajanga iba sentong ya parnoki August 24, 2019 nü Janmashtami benjung amungdang agiba ama ajiteter. WhatsApp telok ka nung aruba noksatem denji osang tatsüka zülua liasü aser iba jagi kü mulung nung kongshi. Janmashtami benjung tenüng nung yimdong sema senzüba sentong nungji kaketshirtem dena liasü aser kaketshirtem teimba ka Naga nungertem ta osang nungji zülua liasü. Aji dang masü saka kaketshirtemi Hindu nunger wako kaka ama lir aser wako nungji Jai Shree Ram ta zülua lir ta osang ajangasa ashi. Iba osang angashidang kü mulung nung ‘tanü Naga nunger ya koleni aoer aser kechi tangatetba nung noktaka lir’ ta tasüngdangbatem aru. Hindu nungeri kümshia kanga tongti süa amungba benjungtem rongnung Krishna Janmashtami ya ka lir, kechiyong iba anogo nung par tsüngrem Krishna aso ta parnoki amanger. Krishna Janmashtami dang Janmashtami mesüra Gokulashtami ta ajar aser iba benjung ya Hindu luni-solar calendar nung ajemdaker, kümshia anogo shimteta amonger. Hindu Seva Samiti, Dimapur-i Dimapur nung Janmashtami ayonga amungba sentong nung Naga nunger kaketshirtemji Khristan tamangertem dang asütsü. Anungji, Hindu nunger tamangba yimsü benjung ka nung Naga kaketshirtem dendaktsübaji ozüng alema inyakba mapa ka ta asenoki angatettsü nüngdaker. Kaketshirtemji parnoki molunga mesüra haihaura kaa iba sentong nung shilem agi asü, mesüra school/college ketdangpurtem/tesayurtemi tetuyuba agütsüba makok shilem agi’ar ibaji bushitsü nüngdak ama bilemer. Tamangba yimsü balala süaka pei sasa molunga tangar tamangba yimsü dak sendakba sentong nung shilem agibabo kecha masü aser iba nung mashishiteper saka Dimapur nung tawa atalokba ama, tangar tamangba yimsü sentong ka nung tanurtem tashiyim agi dendaktsüba yabo tim masü. Iba mesükba inyakyim ya noktangtsüla kechiyong iba ajanga tarutsü nung asenok Naga nungeri timtem tulu ajurutsü ana nung lir. Asenok Naga nunger dak ‘kecha masü’ar’ ta asüba tangatetba lir aser iba tangatetba jagi aiben asenoki mapang shitak nung teinyaktsütem meinyaki süidaktsür aser tatem nung timtemsa ajurua arur. Anungji, iba onük atema ya arogotem mesüra kaketshir telok kari ola adoktsüla aser bushisüngdanga orr, school/college ketdangsertemi aibelenba putetra, tarutsü nung iba mesükba mapa meinyaktsü atema tetuyuba agütsütsüla aser nüngdak dang süra, temzüng/inyakyim kar lateta ayutsüla. Indian Penal Code (IPC) nung Arrla 153A nunga iba ama inyaksangshi/mapa indang shia lir aser aibelenertem merenshitsü lateta lir. Anungji, nüngdak dang süra asenoki okadak iba inyakyim anema ken o benoka temeten bushitsü lenmang-a sadema lapoka lir.