Naga nungertem telongjem nüngdaker : TR Zeliang

October 17, 2015 nü Kohima Local Ground nung “Leaders Walk the Talk” sentong agidang Chief Minister TR Zeliang, Rev. Luoliehu Yimsong aser lennirtem noksa nung angur.

Kohima, October 17 (TYO) : Naga nungertemi “Framework Agreement” angateta Naga yimten tebilemtsü atema telemtetba tajung ka agitsü atema telongjem nüngdaker, ta Nagaland Chief Minister TR Zeliang-i ashi.
“August 3 nü India sorkar aser NSCN(IM) tsüngda tenangzüktep agiba sülen Naga yimten tebilemtsü inyakyim tasen ka tenzükogo. Framework Agreement ajanga Naga yimten tebilemtsü atema telemtetba tajung ka agidaktsünüra, asenok longjemtsüla” ta Zeliang-i Kohima Local Ground nung “Leaders Walk the Talk” nung jembidang ashi.
DAN sorkari telongjem nüngdakba ajiteta state temaitsü noksa nung ‘Telongjem’ ta ser omen züluokogo. Nagaland nung lennirtem ajak – yimten, arogo, kin, mulungtet telok aser Naga yimten teloktem nungi lenir ajaki telongjem atema inyaktsüla, ta paisa ashi.
“Asenok külemi longjemer inyaktsüla. Tanü asenoki asen tsüngda mangatettep aser obang meputep alibatem yutsütsüla. Tesüiba mapang temulung mechitep alibatem meyipa bener marui tatok agütsütepla aser Naga nunger tanü aser asüng putu atema longjemtsüla” ta Nagaland chief minister-isa ayongzük.
“Tang ya asenok tsüngda kati ka lutsütepba mapang masü saka kanga dang süoki ia bilemer tajung atema inyaktsü mapang ka lir. Asenoki tesüiba mapang aibelenbatem asoshi tatok agütsütepdi aser amadokdi, aser telongjem atema inyakdi” ta paisa mepishia ashi.
TR Zeliang-isa lanurtem ayongzüka jembidang, “tanü computer aser internet putu nung lanurtemi lokti len anir, anungji Naga blog, Naga Spear, SMS, twitter, aser whatsapp nunger amala social media timi amshitsü atema lanurtem angatetdaktsütsü nüngdak” ta ashi.
“Nagaland nungi lanur lennirtem adokdaktsünür aser parnoki asen lokti nung temelenshi bener arutsü atema tebilemba tasen bener arua inyakdaktsünür” ta Chief minister-isa ashi.
Leaders Arise Nagaland tenzüker aser Leaders Walk the Talk sentong tenzüker Rev Louliehu-i ashiba agi, iba sentong ya Naga nunger lennirtem saksalemdaktsütsü aser Naga nunger puti otsü nung tanü kanga dang tongtipang mapang ka nung parnok teinyaktsütem angatetdaktsütsü atema ayongzük.
Sentong nung Naga Mothers Association, Advisor Rosemary Dzuvivchu-ia ashiba agi, Naga nunger lennirtem ‘ism’ agientsüla.
“Nagaland nung tenzükdaktsütsü atema lennirtem masü saka tenzüktsü asoshi lennirtem aginür” ta laisa ashi.
Naga lokti nung ongdang aliba agientsü atema Naga nunger lanur aser kaketshir lennirtemi yimsüsürtem ama akümtsü mejangratsüla aser parnok sülen manidaktsüla, ta Rosemary Dzuvivchu-isa lanurtem ayongzük.Iba sentong nung NBCC general secretary Rev. Dr. Kethozelhou Keyho-i tajungshi o jembi aser paisa sentong meshiteta sarasademtsü.
Sentong nung NCRC President, Rev. Dr. Neikedozo Paphino-i yimsüsürtem, NGOs, Civil Societies, Business aser sorkar ketdansgertem atema sarasademtsü aser AGEI General Superintendent, Rev. Moses Murry-i arogo lennirtem atema sarasademtsü.
“Leaders Walk the Talk” sentong nung Angami Public Organisation tir Dr. Vilhousa Seleyi, R&B Minister Y. Vikheho Swu, Pheluophelie Kesiezie, Rev. Dr. Chingmak Chang, Founder Naga blog Yanpvuo, Legal Adviser LAN, ACAUT aser NMA Kezhokhoto Savi nungertemia o jembi.
Sentong nungsa Nagaland Conservatory of Music, Alobo Naga aser Euphony Choir nungertemi ken ajanga shilem agi aser Northfield Higher Secondary School kaketshirtemi ‘Leaders Walk the Talk’ tenangzükba agidaktsü.