Naga nungertem ya tangari mesüzüka anir aotsü temela

Kohima, May 25 (TYO) : Naga nungertem ya tangar nem mesüzükdakja tangaleni anir aotsü temela, anungji tsürabur aser taintemi tetsür aser tebur chanutem taküm ya jungjunga reprangtsüla, ta Nagaland State Commission for Women (NSCW) nung Mendenbula Dr.Temsüla Aoi metetdaktsü.
Lai iba o ya yashi Bodbar nü Phek nung ‘Human Trafficking’ dak aketba temzüng ozüng indang shisalemsatepba sentong ka nung jembidang metetdaktsü. Iba sentong ya NSCW teloki National Commission for Women, New Delhi den yaritepa ayongzükba liasü.
Naga nunger asoshi tia tajung kaji lokti tentet aika lir aser item lokti tentettem jagi tanurtem taküm kümzüka ayutsüba maparen nunga kanga yarir ta laisa metetdaktsü.
Iba amaji asenoki lanurtem asoshia inyaktsüla ta laisa ayongzük.
Tanü asüng nisung aikati teyari tajung agia anepaludaktsütsü asoshi tanurtem bendangleni yoker ajisüaka itemji aika tanurtem angati yaritsü tenüng nung tiyazü jembia parnokji alar küma amshir, anungji item nung jagi jenbua alitsüsa tsüraburtem kanga kümdangtsüla ta laisa ashi.
Kodangsa kidang alir tanurtem dak mejungi benshiba osang angashidir, item osangji bangdak nung alirtem nem metetdaktsütsüla ta Dr.Temsülaisa ashi.
Iba sentong nung kasa onük nung Coordinator-cum-Master Trainer, NSLA, Akumla Longchari-i jembia .liasü.