Naga nungertemi aküm tetushi agüja Isak Chishi Swu meinoktsü

June 30, 2016 nü Agri Expo site, Dimapur nung NSCN/GPRN Mendenbuba, asür Isak Chishi Swu nem akhüm agüja Public Memorial service alidang Nagaland Chief minister, TR Zeliang (abelen), Ato Kilonser, Th. Muivah (tiyong) aser asür, Isak Chishi Swu kinüngtsü, Mrs. Eustar (Khulu) nungertemi jembiba noksa nung angur.

Dimapur, June 30 (TYO) : Brehostibar nü New Delhi nungi NSCN/GPRN mendenbuba asür Isak chishi Swu mang atongba sülen pa den asüpila sentep sentong ka Agri Expo, Dimapur nung Naga nunger meyirijang aika adenshia liogo.
Iba sentong nung nübortem den Nagaland government nung chief minister, T.R.Zeliangi anir yimsüsürtem aser linük tenzükertem telok balala nungi lenirtem arua dena liasü.
Iba asüpila sentep sentong nung Chief Minister,T.R.Zeliangi Nagaland sorkar tenüng nung aser Nagaland Legislative Assembly nung tang temendak aser taoba züngsem ajak tenüng nung NSCN lenir asür Isak Chishi Swu nem aküm agütsü aser kinungertem den mangyim jashi lemsatepba osang metetdaktsü.
“Asenok putu nung Naga nunger lenirtem tongtibang rongnung paa ka liasü. Pa dak ochi aser yimjung meimba tangatetba liasü, pai kodanga pa tangatetba nungi matsüngshi aser Tsüngrem dak mulunglemteta amangba lenir ka liasü,” ta Chief minister, T.R.Zeliang-i metetdaktsü.
“Pai shitakba linük nüchiso asoshi rarar ka ama litetogo, paji lenir tajung ka liasü shibai India sorkar den August 3, 2015 anogo nung Naga yimten jenjang latettsü asoshi tamendakdak ken o ka renema yutsüba tashi len ania aruogo, item mapatem ajak asoshi pa nem tenüngsang agütsür,” ta T.R.Zeliang-isa metetdaktsü.
“Tang ama Naga yimten telemtetba ka dangi arutsü amai alidang, pa asenok nungi piladokbaji tejashitsüka lir, anungji Naga nungertemi pa dang pelaba sayutsüba mapa tajungtibaji Naga nunger ajak longjemer Naga yimten tebilemtsü latettsübaji asütsü,” ta Chief minister-isa metetdaktsü.
Kasa asüpila sentep sentong nung, NSCN/GPRN Ato Kilonser Th. Muivah-i jembidang, “Asür Isak den taoba küm 52 külemi linük tenzükba mapa nung tensa tamajung aika kokteta inyaka arudang, Naga nunger asoshi Tsüngrem nükjidong kechi liasü, aji angateta inyakogo. Onoki Tsüngrem nükjidong angateta inyak aser kati ka mashioktsütep,” ta metetdaktsü.
“Isak ama shibai Naga nunger asoshi taküm bendanga agüja inyak, pa den pilatsübaji temulung ashitsüka lir,” ta Muivah-isa ashi. Naga nunger asoshi küna külemi inyaktsübaji Tsüngremer sentong liasü, iba jagi küna külemi küm 50 dak tali linük tenzükba mapa nung inyakogo,” ta paisa ashi.
Isak taküm alidang pa lenisüba nung India-i Naga nunger yimten tementen otsü ya tangar dang nungi khenyongi balaka ta angatetba aser yaküm küm August 3, 2016 nü India den Naga yimten ken o latettsü asoshi tamendakdak asütsü ken o renema ayuba ajakji Naga nunger asoshi takok tuluka asütsü ta Th.Muivah-isa metetdaktsü.
“Isaki Naga nunger asoshi inyakba mangdangji ataloktsü atema Naga nunger ajak longjemer inyaktsü kanga nüngdak kümogo,” ta Muivah-isa ashi.
Telok balala süaka, NSCN-IM mendenbuba asür Isak Chishi Swu asü pila sentep nung adentsü aruba GPRN/NSCN nung ato kilonser, Wb. Kitovi-ia shilem agia jembidang, asür Isak-i pa dang Tsüngrem akümtsübua inyaktsü asoshi sayu ta metetdaktsü.
Asür Isak Chishi Swu ya Tsüngrem akümtsübuba lenir ka liasü ta paisa kuli agütsü.
Wb. Kitovi-isa Naga nunger adenshia alirtem dang, asenok asüpila sentep nung dang masü saka Naga yimten tebilemtsü akoktsü asoshi inyakba maparen nunga nisung ajaki shilem agia inyaktsü nüngdaker, ta metetdaktsü.
Iba kasa asüpila sentep nung NNC tir General Thenuoselie Keyho, United Liberation Front Assam (ULFA Pro-talk) mendenbuba, Arbindo Raj Khuwa aser NSCN (R) nung mendenbuba, Wangtin Naga nungertemia shilem agia jembia liasü. Parnok ajaki asür Isak Swu nem aküm tetushi agüja jembi.
Iba kasa asüpila sentep sentong nung asür Isak Chishi Swu kinungtsü Eustar Khulu-ia mapang tatsüka agia jembidang, la kinungboi Naga nunger asoshi timtem jenti agia taküm ajak bendanga agüja inyakogo ta metetdaktsü.
Iba sentong nung menden NPMHR nung tongti zülur, Wb.Neigulo Krome liasü aser pai Nagaland angh, P.B.Acharya aser Rajya Sabha MP, Kenye na nungi aruba mangyim jashi lemsatepba shidi zünga metetdaktsü. Iba denji ano Naga Hoho, ENPO,FNR, NMA,UNWO,UNC,NPMHR, NSF, ENSF, Nagaland GBs Federation, WSKH teloktem den Assam, Arunachal aser Burma nungi lenirtemi mangyim jashi lemsatepba osang metetdaktsü.
Iba sentong nungsa kinungertem den yimten aser lokti tentettem den ano tongtibang nisung aikati narojung bener arua asür nem agütsü. Iba sentong nung Alobo Naga aser Naga choir nati ken aten aser NBCC tongti zülur Rev.Dr.Zelhou Keyho-i sarasadema sentong tenzük aser Rev Father Carlos Vicar General-i tatem sarasadem mapang agia liasü.
Iba sentong temer külen NSCN/GPRN lenir Isak Chishi Swu mang NSCN-IM oking Hebron camp-i bener atu. Asüng Hokolbar nü yangji GPRN-i ayongzüka asü pila sentep alitsü aser iba sülen pa mang par yim Chishilimi yimtaki Kohima ajanga bener aotsü aser tananü July 2 nü yangji pa mang aremtsü.
Asür NSCN-IM lenir Isak Chishi Swu asüba osang angashia mangyim jashi lemsatepba osang Lok Sabha MP, Wb.Neiphiu Rio, Rengma Hoho Dimapur Unit, Mokokchung Chamber of Commerce & Industries (MCCI), NPF Central Youth Wing, Tovihoto Ayemi, MLA & Chairman NIDC Ltd., aser Central Nagaland Students’ Association (CNSA) nungertemi metetdaktsüogo.