Naga nungertemi Governor-cum-Interlocutor dak teimla tulu ayur

Kohima, August 16 (TYO): Centre atema interlocutor R N Ravi-i Nagaland nung Governor inyakba ajanga Indo-Naga yimjung olemtep kobi melii tembangtsü ta Naga nungertemi teimla tulu lir, ta tanü Chief Minister Neiphiu Rio-i ashi.
Chief Minister Rio-i Governor tasen pelaa agizüka jembidang “Ravi ya Naga nunger ajaki meteta lir aser pa indang tenüngji Naga nunger kibong ajak nung tetshir” ta ashi.
August 3, 2015 nü Framework Agreement sign asübaji Ravi ajanga lir aser tanü Naga nungertemi iba agreement ajanga Naga nungeri agizüktettsüsa telemtetba ka agitsü imlar. Telemtetba ka agitsü atema onoki nü den mapa inyaktsü. Nagaland nung yimjung bener arutsü, terenlok mapa inyaka aotsü aser tanü tetoktepba putu nung lanurtemi maongka angutsü atema onoki yariteptsü, ta Rio-isa metetdaktsü.
Nagaland Chief Minister-isa Governor Ravi dang district tem sema aotsü aser yimtsüng tanishirtem den ajurutepa sensaksemtsü atema mepishi.
“Naga nungertemi na ya medemer ka ama dang masü saka kibong ka ama bilemer” ta paisa shisem.
TPO president Timikha Koza-ia o jembidang “Naga nungertemi tebang agi meshitetba timtem aser khurettem ajangshiogo aser yimten melatetba ajanga tanü tashi itemji ajurur” ta ashi.
“Naga nungertemi tekaratiba nung yimten latetdaktsünür. Anungji na (Ravi) people’s Governor ka asütsü aser Naga nunger len anitsü atema mepishir. Naga nunger tashimaitba nung tajangzük agiba Governor ka masü saka Naga nunger tashi itdaktsüba Governor ka südaktsünür” ta TPO president-isa metetdaktsü.
Ravi-i Nagaland nung Governor inyaktsü aruba ya Naga nungertem atema temoatsü ka lir ta ENPO president Kekongchim Yimchungru-ia ashi.
Naga nungeri tarutsü kechi ajurutsü mejangjateti tammang tia ka nung alir. Anungji tekaratiba nung Naga nunger maitsü nung mekongshii Naga yimten latettsü mepishir, ta ENPO president-i Ravi ayongzük.
“RN Ravi-i Governor inyakba ajanga Naga yimjung maparen tajungba inyaka aotsü aser tembangtsü, kechiyong Ravi ya India aser Naga nunger tsüngda apu lir” ta CNTC President, N Matong Jamir-ia ashi.
“Onok tanü kanga pelar, kechiyong Naga nunger taginüba metetba dang masü saka Naga yimten tebilemtsü jungjunga angateta alir kati tang mezüng atema Governor inyaker” ta N Matong-isa metetdaktsü.
“Onoki taneptsü aser putepshitsü atema sarasadema arur aser tang iba mapangji tonger ama bilemer. Onoki mapang talangka yimjung aginüa arur aser tang ibaji asangsang nung atalokdaktsünür. Nai Nagaland nung Governor ka ama aser Naga peace talks atema Interlocutor ama inyakdang, mapang talangka melateti aruba yimten tebilemtsü latettsü aser Naga nunger aliba tesem ajunga nung yimjung bener arutsü amanger aser teimla lir” ta CNTC president-isa ashi.
Iba sentong nung Nagaland Bishop Most Rev. Dr. James Thoppil-i sarasadem, Nagaland Adolescent Girls Club, Siiriimi Cultural Society, Kohima, Baptist Revival Church, Kohima aser Purple Fusion teloktemi shilem balala agi.
Sentong nungsa Deputy Chief Minister Y Patton den minister tem, MLA tem aser Naga kin hohotem, civil society aser senso aika aden.