Naga nungertemi Lotha Hoho dang PIL meyipa agitsü mepishir

Kohima, October 19 (TYO) : Nagaland sorkar aser mulungtet telok tongtitemi tanü Lotha Hoho dang parnoki Gauhati High Court nung Petroleum & Natural Gas (PNG) dak sendakba Public Interest Litigation (PIL) benoka aliba meyipa agiang ta mepishia metetdaktsüogo.
Taküm October 1 nü Lotha Hoho-i Nagaland Petroleum and Natural Gas (NPNG) Regulations, 2012 aser NPNG Rules, 2012 anema PIL ka benok.
Iba onük ya October 8 nü angadangdang okadaki NPNG Regulations, 2012 aser NPNG Rules, 2012 nung tashishitsü keta lir aser item ozüng ajanga ali kiburtem totzü mangu tashi temenok agütsütsü lateta mali ta telangzüba agütsü.
Iba dak sendakba nung Hombarnü NPNG Board-i Capital Convention Centre nung rongdak senden ka jazüka agi.
Iba senden nung Naga Hoho, Eastern Nagaland People’s Organisation, Naga Students’ Federation, Naga Mothers’ Association, Naga Council Dimapur aser kin balala nungi tongti teloktem den Changpang Oil Field Land Owners Union nungertem aden.
Okadak PIL benokba ajanga India Linük Temzüng nung Arrla 371A(1)(a) asoshi tetsükdaktsü bener arutsütsü aser Arrla nung Naga nungeri nem temeten agüja aliba kar agientsüsa akümtsü ta tanü senden nung adenertemi bangjemtep.
Naga nunger rongnung shilem kari kasa Naga nungertemi kanga meranga Linük Temzüng nung temeten kar enoksemba anema inyaktsü tenzükogo, ta senden nung adenertemi tebilemba ashi.
July 12, 2013 nü Nagaland sorkari petroleum & natural gas atema Consultative Meeting jazüka agidang lemtetba nungi masetshitsü, ta tanü senden nungsa bangjemtep.
July 12, 2013 senden nung State Level Political Parties, MLAs, MPs, Tribal Hohos aser Nagaland nung Mulungtet teloktem ajak aden aser parnoki Linük Temzüng nung Arrla 371(A) kübok Nagaland nung petroleum & natural gas indang telemtetba takang agia lir.
Tanü senden nung adenertemisa State sorkar dang tekaratiba nung Lotha Hoho den olemtepa iba onük angatetteptsü aser nüngdak dang süra PNG atema State Legal Framework nung temelenshi asütsü tetuyuba agütsü.
Tanü telemtetba agiba nung Temjen Toy, Chairman NPNG Board, P. Chuba Ozukum, President Naga Hoho, Khoiwang Konyak, President ENPO, Subenthung Kithan, President NSF aser Lochumbeni Humtsoe, Secretary, NMA nungertemi sign asü.