Naga nungertemi NSCN-IM nem tashi magütsü : NNC/FGN

Dimapur, Sept.13 (TYO): Naga nungertemi kodanga NSCN-IM nem India den Naga yimten tebilemtsü onük jembitsü asoshi tashi aser temelaba (mandate) agüja mali, anungji tang jembiba yabo Naga nunger o India nunger na tsüngda masü saka India sorkar o NSCN-IM na tsüngda dang lir ta tanü Deobar nü sangdong ka ajanga Wb.S.Singnya Kedahge-i aniba NNC/FGN telok nung Rali Wali Affairs nung kilonser Wb.K.L. Kronui metetdaktsü.
Tang India den Naga yimten onük jembiba yabo NSCN-IM tena tsüngda dang asünungji tenati renemba onükjibo takidak makatsü ta paisa metetdaktsü.
NSCN-IM teloki India sorkar den tama telemtetba agia yur Naga nunger den shisalemsatepba sentongjibo nübortemi tashi (mandate) agütsüba amato mezüngshitsüla. NSCN-IM teloki India den Naga onük jembinüra tamasa nübortem dang nungi tashi meshitsüla, saka tang parnoki inyakba yabo mashikoshi inyakba mapa ka asütsü ta NNC/FGN telokisa metetdaktsü.
Mezüngyongi Naga nungertemi linük tenzükertem nem Naga nunger asoshi ‘independence’ aser ‘sovereignty’ atema raratsü tashi agütsü, anungji iba jenjangji metongra Naga yimten tebilemtsü tatembang küma lemtetba ken o masütsü ta parnokisa metetdaktsü.
Yimten ken o jembia aodang timtem ajurura nübortem den jembir külenang telemtetba agitsüla . Ajisüaka, tang NSCN-IM o India sorkar na tsüngda tangatettep ken o renema aliba yabo Naga nungertemi aginüba dang nungi parnok ajangzüktsüang tulubalen bilema inyakba mapa ka asütsü ta NNC/FGN teloki metetdaktsü.
Koba telemtetba agidir agiaka nübortem den masüngdangtepi agiba telemtetbajibo akhümketa magizüktettsü ta parnokisa metetdaktsü.
” NSCN (IM) ya telok aika rongnung ka dang lir. Parnoki tanga yimten telok tenüng nung jembitsü makok aser India sorkar den telok kati renemba ken o ji “Indo-Naga Agreement” mesütettsü,” ta NNC/FGN telokisa metetdaktsü.
“NNC/FGN teloki Naga nunger temeten asoshi inyaktsü tangatetba aser temulungtetba tulu lir, anungji shingaia onok tenüng nung jembitsü makok. Iba jagi tangar telok India sorkar den jembiba anema nokdaker ta masü, democracy nung aji ataloktsüla, ajisüaka onoksasa onok tenüng nung jembitsüba temeten anema shingaia kecha inyaktsü makoktsü,” ta NNC/FGN lenirisa metetdaktsü.