Naga Peace Accord ya Centre-i Manipur atema sang yutsüba lir: JD(U)

Imphal, September 07 (Agencies): August 3 nü India sorkar aser NSCN (IM) na tsüngda Manipur sorkar den mejembitepi ‘Naga Peace Accord’ tezüngzüktep agiba ya sang yutsüba ka lir, koba ajanga Manipur loksatsüa akok, ta Janata Dal United (JDU) Manipur-i ashi.
Deobar nü Imphal nung aliba party office nung osangbenertem senden nung jembidang JD (U) Manipur State Tir, Moirangthem Tombi-i, 2001 küm BJP yimsüsüba mapang Manipur nung taimaket nisung aika süogo aser aika lemtaa kümogo, ta ashi.
Tawa Yimjung Tezüngüktep agiba ya ‘accord’ ka masü, kechiyong tan-a iba asoshi State sorkar den mejembi, ta Tombi-i ashi.
Iba tezüngzüktep ya state litsü raksatsütsü atema Centre nung BJP-i aniba sorkari sang yutsüba lir, ta paisa ashi.
Tombi-isa, iba dak sentakba nung September 1, 2015 nü Ato kilonser Narendra Modi, Home Minister Rajnath Singh aser JD(U) National Tir Sharad Yadav nunger nem memorandum ka agütsüogo aser parnok dang, iba tezüngzüktep nung aliba onük ajak India nung yimtenren telok ajak nem metetdakjang, ta mepishiogo, ta ashi.
Iba memorandum nungji takhangba onük asem agüja lir, ta paisa shisem.
Manipur nung tensa maneni mesüngjemteti aliba ya kanga tia maka ta shia JD(U) tir Moirangthem-i Manipur nung Naga, Kuki, Brahmin, Pangal aser Metei nungertem ajakji lisopurtem lir, ta ashi.