Naga Peoples Movement for Human Rights-i aitsür

Dimapur, September 1 (TYO) : March 2015 nung National Socialist Council of Nagaland (Khaplang)-i Ceasefire agienba sülen nungi sepai aser telungpur tsüngda kahtepba, amakba, mita aoba aser ibala mesükba tatalokba maneni atalokyonga arur aser ‘Yimjung’ tenüng amer sepaitemi nübortem timtemdaktsüba mapa inyaker, ta Naga Peoples Movement for Human Rights (NPMHR)-i sangdong ka nung metetdaktsü.
Item tatalokbatem nung India nunger sepaitem aser Naga nunger telungpurtem taküm aika samaogo aser tasür ajak asoshi onoki mangayimer aser parnok tanela anisüngzük angutsü atema sarasademtsür, ta NPMHR-isa ashi.
Ano külen, küm aika rarayonga aruba mapang civilian tem taküm aika samaba aser reshikangshiba manener. Armed Forces (Special Powers) Act ajanga tashi agüja aser kümzüka yua Indian armed forces-i Naga nunger civilian tem reshikangshir aser tepseter, ta NPMHR sangdong nungsa shia lir.
Parnokisa ashiba agi, August 28, 2015 nü Assam Rifles-i NSCN (K) telok ka amak aser iba mapang civilian pezü densema nisung tashi tugu kahset. August 27 nikongtsütsü nungi parnoki mendanga atar telungpurtemji kahset ta Assam Rifles-i asükümküma osang prokshiogo.
August 30 nü NPMHR-i iba lendong nung yirur civilian ana semdang aser tena den sensaksemdang angazükba agi Assam Rifles sepaitemi masürtem dak kanga mejungi züka merenshi.
Assam Rifles-i mebilemdangi inyakba aser mashi inyakba mapatem nungi Naga nungertem jenbua mali aser item ya loktiyimten tesayuba aser alima nung meimchir temetentem anema lir, ta NPMHR-isa aitsü.
Indian Armed Forces-i meimchir taküm mapayui inyaksangshiba kukua aitsür aser India sorkari sepaitem ajanga Naga nunger civilian anema mapa inyakba ta meimchir anema lir, NPMHR-isa sangdong nung metetdaktsü.