Naga Peoples Movement for Human Rights (NPMHR)-i aitsür

Dimapur, July 19 (TYO) : Major Surinder Singh lenisüba kübok Assam Rifles-i Wuzu yimtsüng nung Naga nunger kaketshir ana khasetba aser tetsür ka yirutsüba kukua aitsür, ta Naga Peoples Movement for Human Rights (NPMHR) sangdong ka ajanga metetdaktsü.
Arishi küm 14 tain Tuzali aser küm 13 tain Aso na tepsetba den arishi küm 24 tain Vitsurho yirutsübaji ajaki aitsütsüla aser Universal Declaration of Human Rights nung ajemdaker United Nations-i mapa inyaktsüla, ta NPMHR sangdong nung shia lir.
Ajungben lendong nung masü saka Armed Forces Special Powers Act nung shia aliba ama item nisungtem tepset aser iba ya India sorkari meimchir taküm mapayui inyaksangshiba lir. Anungji tai maket kaketshirtem tepsetba kukua aitsür, ta NPMHR-i metetdaktsü.
Wuzu yimtsüng nung lendong atalokba ajanga 1979 küm Bible Hill, Phek jila nung arishi küm 15 tain Chikhoyi aser küm 14 tain Nuhutso nati parnok den English jembiba atema 14th Assam Rifles-i tena züka merenshiba aser reshikangshiba tatalokba bilemtetdaktsür.
Ano iba tatalokba ajanga, Phor aser Wuzu yimtem anasa aliba Matikhru yimtsüng nung Indian Army-i tebur ajak anidener reshikangshiba aser tekolak tangzüka yokba “Matikhru Massacre” tatalokba bilemtetdaktsür.
Indian Army-i Nagaland nung meimchir temeten anema inyaksangshia aruba zünger mezüngma lir aser tan tatalokba nung Assam Rifles sepaitemi Naga nunger tasümang hao ta melii amshiba inyakyim NPMHR-i kukua aitsür.
Assam Rifles sepaitemi kaketshir khasetba den tetsür yirutsüba osang angashia Naga nungertem taoksa nung lia, külen India nunger Media-i channel balala nung India sepaitemi Nagaland nung kiralongrar 7 aser civilian ana kahset ta asüküma osang sangdongba manen.
India nunger media-i mebilemdangi aser kuli mebushidangi osangtem sangdong aser iba ya ajanga Naga nunger jashidaktsüogo. Ano külen Assam Rifles ketdangsertemi kaketshir anaji NSCN (K) telungpurtemi khaset ta aitsü, saka asüngdanga ao nung iba mapang telungpurtem anameta maliasü ta angazükogo.
Onoki item kuli ya lendong atalokba tesem tonga oa aser temeket nung aliba yimtsüngtem nung asüngdangyaba sülen angu. Anungji onoki Indian nunger media arur Assam Rifles asü Naga nunger kaketshirtemji shitakba kiralongrartem’ar reprangdangang ta jaoker, ta NPMHR-isa sangdong nung shia lir.
Ano, tanurtem sepai nung aniokbaji tanur temeten anema inyakba mapa ka lir aser Naga nunger dena alimai magizüker, ta NPMHR-isa shisema lir.
Nagaland nung DAA aser AFSPA ozüng ayuba ajanga alima dang India-i Naga linük makbangba aser ozüng anema agisemba sayur. Item ozüng ajanga parnoki Naga nunger taginüba ola nembangtsüba aser tashiyim agi Naga nunger madak yimsü asüba sayur, ta NPMHR-isa metetdaktsüogo.