Naga Republic Day sentong takok ngua mungogo

Dimapur, Metsüremi/March 21 (TYO): March 21 nü Ceasefire Office Mon nung 40buba Naga Republic Day amungba mapang NSCN/GPRN (Reformation) tir Y.Wangtin Naga-i Naga nunger yimten yimsüsüba tsütsü shisa lemsatepogo.
Pai ashiba agi, Shillong Accord’ koba Naga nunger yimten yimsüsüba asoshi jenjang tamajung ka liasü iba ya sign asüba sülen 1980 küm April ita asür Isak Chishi Swu, Inno Th. Muivah, asür SS Khaplang aser asür Gen(Retd) Khole nunger lennisüba kübok National Socialist Council of Nagaland (NSCN) tentetba ajanga Naga nunger Sovereignty kümzüka ayu. Yimtenren nisung kar ajangzüktsü mechi iba tenangzüktepba yanglua Naga nunger yimtenren tsütsü temeden yoka achitsü aliba nungi teyanglur Tsüngremi asenok kümzükogo aser ibayongji tanübo Naga nungertem ya tesamaba kin ka masü saka tangar ajak dang nungi sobaliba aser libaliro balaka aliba kin ka ama züngshir aser India sorkaria iba ya agizüker aser mapang mapangshia iba ya jangjashitsür.
Naga nunger yimtenren tsütsü temeden ya kecha dena memelenteptsü aser asenok taoba, tang aser tarutsü puti otsü kodanga rema mayutsü.
NNPGS/WC aser India sorkar tsüngda tang koba telemtetba ka asoshi jembishinüdar, iba ya lenmang shidak nung tejakleni odar aser telok anapronglai yimtenren tsütsü ajaki agizüktettsüsa telemtetba ka agitsü asoshi kanga meranga inyakdar aser takaratiba nung telemtetba tajung ka agitsü, ta paisa ashi.
Aji asünung Naga nungertemi asenok jenjang meteta akhang akhanga nokdaktsüla aser asen temeden akhangtsüla. Iba den ano tang yimten yimsüsüba ren dak ajemdaker asenok asoshi telemtetba kechi tajungtiba aji agizüktsüla. Tajungsang Tsüngrem asen lennir, tashi aser tejenokdak südakjang, ta Wangtin Naga-i ashi.